আমেৰিকা আৰু চীনৰ মাজত বৃদ্ধি পাইছে শুল্ক যুদ্ধ। আমেৰিকাৰ ৰাষ্ট্ৰপতি ড’নাল্ড ট্ৰাম্পে এতিয়া চীনৰ পৰা আমেৰিকালৈ আমদানি কৰা সামগ্ৰীৰ ওপৰত শুল্ক ১০৪ শতাংশৰ পৰা ১২৫ শতাংশলৈ বৃদ্ধি কৰিছে। ইয়াৰ ফলত আমেৰিকা আৰু চীনৰ মাজত বাণিজ্যিক যুদ্ধৰ সম্ভাৱনা বৃদ্ধি পাইছে।
ইয়াৰ লগতে ট্ৰাম্পে অৱশ্যে আন বহু দেশৰ ওপৰত পাৰস্পৰিক শুল্ক বন্ধ কৰি দিছে, কিয়নো তেওঁলোকে প্ৰতিশোধমূলক ব্যৱস্থা গ্ৰহণ কৰাৰ পৰিৱৰ্তে আলোচনাৰ বাবে হাত আগবঢ়াইছে।
আনহাতে চীনে এই ক্ষেত্ৰত আমেৰিকাৰ সৈতে প্ৰতিযোগিতাত অৱতীৰ্ণ হোৱা যেন অনুভৱ কৰিছে ট্ৰাম্পে। ড’নাল্ড ট্ৰাম্পৰ শুল্ক সন্দৰ্ভত বেইজিঙেও একেধৰণৰ প্ৰতিক্ৰিয়া প্ৰকাশ কৰিছে। যোৱা ৯ এপ্ৰিলত চীনে আমেৰিকাৰ আমদানিৰ ওপৰত ৮৪ শতাংশ শুল্ক আৰোপ কৰে। ইফালে জানুৱাৰী মাহত কাৰ্যভাৰ গ্ৰহণৰ পিছতেই ট্ৰাম্পে চীনা সামগ্ৰীৰ ওপৰত ৫বাৰকৈ শুল্ক বৃদ্ধি কৰিছে।
বিশ্বৰ দুখন বৃহত্তম অৰ্থনীতি আমেৰিকা আৰু চীনৰ মাজত ক্ৰমাৎ বৃদ্ধি পোৱা বাণিজ্যিক যুদ্ধত চীনে বাৰে বাৰে ‘অন্তলৈকে যুঁজিবলৈ’ চেষ্টা কৰি আহিছে। চীনে ট্ৰাম্প প্ৰশাসনৰ “ভয়ংকৰ” কৌশলৰ উদ্ধৃতি দি বিশ্ব বাণিজ্যিক সংস্থাৰ ওচৰত অভিযোগ দাখিল কৰা বুলিও জানিবলৈ দিয়ে।
পিনপইণ্ট এচেট মেনেজমেণ্টৰ মুখ্য অৰ্থনীতিবিদ জিৱেই জাঙে এএফপিক জনোৱা মতে চীনে পিছুৱাই নাযায় বুলি “স্পষ্ট সংকেত” প্ৰেৰণ কৰিছে আৰু লগতে কয় যে এই সংঘাতৰ পৰা ওলাই অহাৰ দ্ৰুত আৰু সহজ উপায় নাই।
সংবাদ মাধ্যমৰ তথ্য অনুসৰি, চীনে বিৰল খনিজ পদাৰ্থৰ ৰপ্তানি আৰু অধিক নিয়ন্ত্ৰণ কৰিব পাৰে। এই খনিজ পদাৰ্থসমূহ কম্পিউটাৰ চিপ আৰু বৈদ্যুতিক বাহনৰ বেটাৰী আদি উচ্চ প্ৰযুক্তিৰ সামগ্ৰীত ব্যৱহাৰ কৰা হয়। বিশ্বৰ বিৰল খনিজ পদাৰ্থৰ যোগানৰ এক বৃহৎ অংশ চীনে নিয়ন্ত্ৰণ কৰে। ইয়াৰ উপৰিও চীনে কৃষিজাত সামগ্ৰীৰ দৰে উচ্চ প্ৰভাৱৰ সামগ্ৰীৰ ওপৰত শুল্ক বৃদ্ধি কৰি এপল-টেছলাৰ দৰে উচ্চ প্ৰফাইল আমেৰিকাৰ কোম্পানীক লক্ষ্য কৰি ল’ব পাৰে।
