মোগল সম্ৰাট ঔৰংজেৱৰ সমাধিৰ বিষয়টো আকৌ এবাৰ সংবাদ মাধ্যমৰ শিৰোনামত। ঔৰংজেবৰ সমাধিৰ নিৰাপত্তাৰ প্ৰতি আশংকা প্ৰকাশ কৰিছে মোগল পৰিয়ালৰ উত্তৰাধিকাৰীয়ে। ঔৰংজেৱৰ সমাধিৰ সংৰক্ষণৰ দাবীত মোগল বংশৰ স্বঘোষিত উত্তৰাধিকাৰী বাহাদুৰ শ্বাহ জাফৰৰ বংশধৰ ইয়াকুব হাবিবুদ্দিন টুচিয়ে ৰাষ্ট্ৰসংঘলৈ প্ৰেৰণ কৰিছে পত্ৰ।
উল্লেখ্য যে, বিগত কিছুমাহৰ পৰা মোগল সম্ৰাট ঔৰংজেৱৰ সমাধি ভাঙি পেলোৱাৰ বাবে বিজেপি নেতাসকলৰ পৰা যথেষ্ট দাবী উত্থাপন হৈছিল, তাৰ পিছত বিৰোধী দল আৰু বিজেপিয়ে ঔৰংজেৱৰ নামত ইজনে সিজনৰ বিৰুদ্ধে বহু অভিযোগ-প্ৰতি অভিযোগ উত্থাপন কৰিছিল৷
দীৰ্ঘদিন ধৰি চলি থকা এই বিতৰ্কৰ পিছতে এতিয়া ইয়াকুব হাবিবুদ্দিন টুচিয়ে আনুষ্ঠানিকভাৱে ৰাষ্ট্ৰসংঘত আবেদন দাখিল কৰি সমাধিৰ সুৰক্ষাৰ দাবী জনাইছে।
তেওঁ কয় যে, ‘মই আনুষ্ঠানিকভাৱে ৰাষ্ট্ৰসংঘত এখন আবেদন দাখিল কৰিছো, মহাৰাষ্ট্ৰৰ ছাত্ৰপতি সম্ভাজিনগৰত অৱস্থিত মোৰ পূৰ্বপুৰুষ সম্ৰাট ঔৰংজেৱ আলমগীৰৰ সমাধিৰ বাবে তাৎক্ষণিক সুৰক্ষাৰ দাবী জনাইছো।’
ঐতিহ্যমণ্ডিত কীৰ্তিচিহ্ন সংৰক্ষণ কৰাটো আন্তঃৰাষ্ট্ৰীয় আইনৰ অন্তৰ্ভুক্ত বুলিও তেওঁ পত্ৰখনত উল্লেখ কৰে।
উল্লেখ্য যে, এমাহ পূৰ্বে ঔৰংজেৱৰ সমাধি আঁতৰোৱাৰ বিতৰ্কক কেন্দ্ৰ কৰি মহাৰাষ্ট্ৰৰ নাগপুৰত অশান্তি বিয়পি পৰিছিল।
