অভিভাৱকৰ ইচ্ছাৰ বিৰুদ্ধে বিবাহপাশত আবদ্ধ হোৱা যুৱক-যুৱতীসকলক লৈ এলাহাবাদ উচ্চ ন্যায়ালয়ে প্ৰদান কৰিছে ডাঙৰ মন্তব্য। অভিভাৱকৰ ইচ্ছাৰ বিৰুদ্ধে বিবাহপাশত আবদ্ধ হোৱা এনে দম্পতীয়ে আৰক্ষীৰ পৰা কোনো ধৰণৰ সুৰক্ষা নাপাব বুলি আদালতে প্ৰকাশ কৰিছে। সুৰক্ষা বিচাৰি দম্পতীয়ে দাখিল কৰা আবেদনৰ শুনানি গ্ৰহণ কৰি আদালতে এই সিদ্ধান্ত প্ৰদান কৰে।
আদালতে কয় যে উপযুক্ত ক্ষেত্ৰত দম্পতীক সুৰক্ষা প্ৰদান কৰিব পাৰি, কিন্তু যিকোনো ভাবুকিৰ ক্ষেত্ৰত এনে দম্পতীয়ে ইজনে সিজনক সহায় কৰিবলৈ শিকিব লাগে আৰু সমাজৰ মুখামুখি হ’ব লাগে।
শ্ৰেয়া কেছৰৱানী আৰু তেওঁৰ স্বামীয়ে দাখিল কৰা ৰিট আবেদনৰ শুনানি গ্ৰহণ কৰি ন্যায়াধীশ সৌৰভ শ্ৰীবাস্তৱে এই মন্তব্য কৰে। তেওঁলোকৰ আবেদনত দিয়া বক্তব্যসমূহ বিবেচনা কৰাৰ পিছত আদালতে তেওঁলোকৰ ৰিট আবেদনখন নিষ্পত্তি কৰি কয় যে আবেদনকাৰীসকলৰ বাবে কোনো গুৰুতৰ ভাবুকি নাই।
