ধাৰাসাৰ বৰষুণৰ ফলত জম্মু-কাশ্মীৰৰ ৰামবান জিলাত চলিছে ব্যাপক ধ্বংসলীলা। দেওবাৰে পুৱাৰ ভাগত ৰামবানৰ বিভিন্ন স্থানত হোৱা বৰষুণ বা ভূমিস্খলনৰ ফলত ৩জন লোকৰ প্ৰাণহানি হয়।
একে সময়তে ছেৰী বাগনা অঞ্চলত ডাৱৰ বিস্ফোৰণৰ এক কৰুণ ঘটনা সংঘটিত হয়। এই দুৰ্যোগৰ পিছত অঞ্চলটোত যথেষ্ট বিশৃংখলতাৰ সৃষ্টি হয়। স্থানীয় আৰক্ষী আৰু সাহায্যকাৰী দলে বিধ্বস্ত অঞ্চলত উদ্ধাৰৰ দায়িত্ব লয় আৰু প্ৰায় ১০০ জন লোকক নিৰাপদে উদ্ধাৰ কৰা হয়।
এই শোকাৱহ ঘটনাক লৈ গভীৰ শোক প্ৰকাশ কৰিছে ৰাজ্যখনৰ মুখ্যমন্ত্ৰী ওমৰ আব্দুল্লাই। ছ’চিয়েল মিডিয়া প্লেটফৰ্মত এটা পোষ্টৰ জৰিয়তে তেওঁ শোক প্ৰকাশ কৰি কয় যে, ৰামবানত হোৱা এই বিধ্বস্ত ভূমিস্খলন আৰু ক্ষন্তেকীয়া বানপানীত তেওঁ গভীৰভাৱে দুখী। ক্ষতিগ্ৰস্ত পৰিয়াল সমূহৰ প্ৰতি তেওঁ সমবেদনাও জ্ঞাপন কৰে।
লগতে তেওঁ কয় যে, জম্মু-কাশ্মীৰ চৰকাৰ বৰ্তমান স্থানীয় প্ৰশাসনৰ সৈতে যোগাযোগত আছে আৰু তাৎক্ষণিকভাৱে উদ্ধাৰ আৰু সাহায্য অভিযান যাতে য’তেই প্ৰয়োজন হয়, তাতেই উপস্থিত হোৱাটো নিশ্চিত কৰা হৈছে। বতৰ আৰু ভ্ৰমণ সম্পৰ্কীয় পৰামৰ্শ মানি চলাৰ লগতে স্পৰ্শকাতৰ আৰু বিপদজনক অঞ্চলত অপ্ৰয়োজনীয় চলাচলৰ পৰা আঁতৰি থাকিবলৈ তেওঁ নাগৰিকসকলক আহ্বান জনায়।
আনহাতে, বিষয়াসকলে জনোৱা মতে, অবিৰত বৰষুণৰ বাবে জম্মু-শ্ৰীনগৰ ৰাষ্ট্ৰীয় ঘাইপথৰ নশ্ৰী-বনিহালৰ মাজত প্ৰায় এক ডজন ঠাইত ভূমিস্খলন আৰু বোকা খহনীয়াৰ ঘটনা সংঘটিত হয়। ইয়াৰ বাবেই সকলো যাতায়ত বন্ধ হৈ পৰে। লগতে জিলাখনৰ সকলো চৰকাৰী-বেচৰকাৰী বিদ্যালয়-মহাবিদ্যালয় সোমবাৰে বন্ধ ঘোষণা কৰা হৈছে।
ৰামবানৰ ছেৰী বাগনা গাঁৱত ডাৱৰ বিস্ফোৰণত তিনিজন লোকৰ মৃত্যু হোৱা বুলি সকলো বিষয়াসকলে জানিবলৈ দিয়ে। নিহত দুজনৰ নাম আকিব আহমেদ আৰু মহম্মদ চাকিব। তেওঁ কয় যে, বৰ্তমানেও গাঁওখনত উদ্ধাৰ অভিযান চলি আছে।
ধৰ্ম কুণ্ড গাঁৱত ক্ষন্তেকীয়া বানপানীৰ ফলত প্ৰায় ৪০টা ঘৰ ক্ষতিগ্ৰস্ত হোৱা বুলি বিষয়াসকলে জানিবলৈ দিয়ে। তেওঁ কয় যে ১০টা ঘৰ সম্পূৰ্ণৰূপে ক্ষতিগ্ৰস্ত হোৱাৰ লগতে বাকীবোৰ আংশিকভাৱে ক্ষতিগ্ৰস্ত হৈছে। ডাৱৰ বিস্ফোৰণ আৰু অবিৰত বৰষুণৰ মাজতো আৰক্ষীয়ে সেই স্থানত উপস্থিত হৈ আৱদ্ধ হৈ থকা ১০০ৰো অধিক গাঁওবাসীক উদ্ধাৰ কৰে বুলি বিষয়াসকলে জানিবলৈ দিয়ে।
