এইবাৰো কেন্দ্ৰীয় লোকসেৱা আয়োগৰ (ইউ পি এছ চি) অসামৰিক সেৱা পৰীক্ষা ২০২৪ৰ চূড়ান্ত ফলাফলত ভাৰতীয় কন্যাৰ দপদপনি অব্যাহত আছে। ৫ গৰাকী কন্যাই শীৰ্ষ ১০ ৰ ভিতৰত স্থান দখল কৰাৰ বিপৰীতে প্ৰথম দুটা স্থানতে আছে দুগৰাকী কন্যা।
এইবাৰো বিগত বছৰবোৰৰ দৰে কন্যাৰ কঠোৰ পৰিশ্ৰম, সংগ্ৰাম আৰু দৃঢ়তাৰ নিদৰ্শন দেখা গৈছে। কেন্দ্ৰীয় লোকসেৱা আয়োগৰ অসামৰিক পৰীক্ষাত শীৰ্ষস্থান দখল কৰা পাঁচগৰাকী কন্যাৰ বিষয়ে জানো আহক…
প্ৰথম স্থান- শক্তি ডুবে (উত্তৰ প্ৰদেশ)
কেন্দ্ৰীয় লোকসেৱা আয়োগৰ অসামৰিক পৰীক্ষাত শীৰ্ষস্থান দখল কৰা শক্তি ডুবে প্ৰয়াগৰাজৰ বাসিন্দা। বিজ্ঞানৰ ছাত্ৰী শক্তিয়ে এলাহাবাদ বিশ্ববিদ্যালয়ৰ পৰা জৈৱ ৰসায়ন বিজ্ঞানত বি এছ চি কৰি তাৰ পিছত বেনাৰস হিন্দু বিশ্ববিদ্যালয়ৰ পৰা স্নাতকোত্তৰ ডিগ্ৰী সম্পূৰ্ণ কৰে। তেওঁ ৰাজনীতি বিজ্ঞান আৰু আন্তঃৰাষ্ট্ৰীয় সম্পৰ্কক ঐচ্ছিক বিষয় হিচাপে বাছি লৈছিল। ২০১৮ চনৰ পৰা প্ৰস্তুতি চলাই অহা শক্তিয়ে অৱশেষত নিজৰ সপোন বাস্তৱায়িত কৰিবলৈ সক্ষম হয়।
দ্বিতীয় স্থান- হৰ্ষিতা গোয়েল (হাৰিয়ানা)
দ্বিতীয় স্থানত থকা হৰ্ষিতা মূলতঃ হাৰিয়ানাৰ যদিও তেওঁ বিগত কিছু বছৰৰ পৰা গুজকৰাৰ বডোদৰাত স্থায়ীভাৱে থাকিবলৈ লৈছিল। চাৰ্টাৰ্ড একাউণ্ট হৰ্ষিতাই সমাজ সেৱাৰ বাবে ত্যাগ কৰিছিল নিজৰ বিত্তীয় জগতখন।
চতুৰ্থ স্থান- মাৰ্গী চিৰাগ শ্বাহ (আহমদাবাদ, গুজৰাট)
গুজৰাট প্ৰযুক্তিবিদ্যা বিশ্ববিদ্যালয়ৰ পৰা কম্পিউটাৰ ইঞ্জিনিয়াৰিং অধ্যয়ন কৰা মাৰ্গীয়ে সমাজবিজ্ঞানক ঐচ্ছিক বিষয় হিচাপে বাছি লৈ সমগ্ৰ ভাৰতবৰ্ষৰ ভিতৰতে চতুৰ্থ স্থান লাভ কৰে।
ষষ্ঠ স্থান- কোমল পুনিয়া (উত্তৰ প্ৰদেশ)
দ্বিতীয় প্ৰয়াসত ইউ পি এছ চি ক্লিয়াৰ কৰি কোমল পুনিয়াই উত্তৰ প্ৰদেশৰ ছাহাৰানপুৰ জিলালৈ গৌৰৱ কঢ়িয়াই আনিছে। কোমলৰ কঠোৰ পৰিশ্ৰম আৰু আবেগে দেখুৱাই দিলে যে নিষ্ঠা আৰু নিৰন্তৰ প্ৰচেষ্টাৰে যিকোনো লক্ষ্যত উপনীত হ’ব পাৰি।
সপ্তম স্থান- আয়ুষী বংশাল (গোৱালিয়ৰ, মধ্যপ্ৰদেশ)
২০২২ চনত ১৮৮ নম্বৰ আৰু ২০২৩ চনত ৯৭ নম্বৰ স্থান লাভ কৰিছিল আয়ুষীয়ে এইবাৰ সপ্তম স্থান দখল কৰি নিজকে নতুন শিখৰলৈ লৈ যায়। আয়ুষীয়ে শৈশৱতে পিতৃক হেৰুৱাইছিল যদিও মাকৰ প্ৰেৰণা আৰু কঠোৰ পৰিশ্ৰমৰ ফলত এই কঠিন পৰীক্ষাত উত্তীৰ্ণ হয়। আই আই টিৰ বাবে প্ৰস্তুতি চলাবলৈ তেওঁ দিল্লীলৈ আহিছিল।
