কাশ্মীৰৰ পেহেলগামত সংঘটিত সন্ত্ৰাসবাদী আক্ৰমণৰ বিৰুদ্ধে ৰাজস্থানৰ জয়পুৰতো অব্যাহত আছে প্ৰতিবাদ। ইফালে প্ৰতিবাদৰ সময়তে এক বৃহৎ হুলস্থুলৰ সৃষ্টি হয়। অভিযোগ অনুসৰি, প্ৰতিবাদৰ সময়তে বিজেপিৰ বিধায়ক বালমুকুন্দ আচাৰ্যই লগত লৈ আহে ‘পাকিস্তান মুৰ্দাবাদ’ বুলি লিখা পোষ্টাৰ।
প্ৰতিবাদ শেষ হোৱাৰ পিছতে বিজেপি বিধায়কগৰাকীৰ লগতে তেওঁৰ লগত অহা ৰাইজে জোহৰি বজাৰৰ মছজিদৰ বাহিৰত এই পোষ্টাৰবোৰ লগাই ‘জয় শ্ৰী ৰাম’ শ্ল’গান দিয়ে।
এই ঘটনাৰ বাবেই ২৫ এপ্ৰিল সন্ধিয়া জয়পুৰত ৰাজপথত সমবেত হৈ বিজেপি বিধায়কজনৰ বিৰুদ্ধে এফআইআৰ দাবী কৰি হাজাৰ হাজাৰ লোক ৰাজপথত সমবেত হয়। ৰাইজে সন্মতি দি এই গোচৰ পঞ্জীয়নৰ আশ্বাস দিয়াৰ পিছতহে প্ৰতিবাদৰ অন্ত পেলায়। এই একেটা মছজিদত ৩১ মাৰ্চত পবিত্ৰ ঈদৰ উৎসৱত নামাজীৰ ওপৰত হিন্দুসকলে ফুলৰ বৰষুণ কৰিছিল।
পিছে এতিয়া ২২ এপ্ৰিলত দক্ষিণ কাশ্মীৰৰ পেহেলগামত সংঘটিত সন্ত্ৰাসবাদী আক্ৰমণৰ বিৰুদ্ধে সমগ্ৰ দেশৰ লগতে ৰাজস্থানৰ ৰাজধানী জয়পুৰতো ৰাইজে প্ৰতিবাদ সাব্যস্ত কৰিছে। পেহেলগামৰ বৈছাৰণ উপত্যকাত সন্ত্ৰাসবাদীয়ে পৰ্যটকক ধৰ্মৰ ভিত্তিত গুলীচালনা কৰে। ইয়াৰ বাবে দেশবাসীৰ মাজত ক্ষোভৰ সৃষ্টি হোৱাৰ লগতে একাংশ লোকে মুছলমান সম্প্ৰদায়ৰ জনসাধাৰণৰ বিৰুদ্ধে শ্লোগান উত্থাপন কৰিছে।
একে সময়তে অভিযোগ অনুসৰি, জয়পুৰত বিজেপিৰ বিধায়ক তথা সমৰ্থকসকলে সংখ্যালঘুৱে বহু আপত্তিজনক শ্লোগানও উত্থাপন কৰে। ইয়াৰ বাবেই তাত থকা পৰিৱেশৰো অৱনতি ঘটিবলৈ ধৰিলে। নিশা শ শ লোকে মছজিদৰ বাহিৰত সমবেত হৈ প্ৰতিবাদ আৰু শ্লোগান দিবলৈ আৰম্ভ কৰে। বিজেপিৰ বিধায়ক বালমুকুন্দ আচাৰ্য আৰু তেওঁৰ সমৰ্থকৰ বিৰুদ্ধে ব্যৱস্থা গ্ৰহণৰ দাবী জনায় একাংশ ৰাইজে।
ইয়াৰ ওপৰত আৰক্ষী আয়ুক্তকে ধৰি সকলো বিষয়াই সেই স্থানত উপস্থিত হয়। এই সমগ্ৰ অঞ্চলটো এটা কেণ্টনমেণ্টলৈ ৰূপান্তৰিত কৰা হ’ল। আৰক্ষী বিষয়াসকলে এই অভিযোগৰ ভিত্তিত বিহিত ব্যৱস্থা গ্ৰহণৰ আশ্বাস দিয়ে আৰু তাৰ পিছত এই প্ৰতিবাদৰ অন্ত পেলায়।
আনহাতে বিজেপিৰ বিধায়ক বালমুকুন্দ আচাৰ্যই কয় যে, পাকিস্তান মুৰ্দাবাদক লৈ কোনোবাই কিয় আপত্তি কৰিব পাৰে? ইয়াৰ বিৰোধিতা কৰা মানুহ পাকিস্তানৰ সমৰ্থক। এই বিষয়টোক লৈ বৰ্তমান জয়পুৰৰ পৰিৱেশ উত্তাল হৈ উঠিছে।
