জম্মু-কাশ্মীৰৰ পেহেলগামত সংঘটিত সন্ত্ৰাসবাদী আক্ৰমণৰ পিছত ভাৰতে সিন্ধু জল সন্ধি স্থগিত ৰখাৰ সিদ্ধান্ত লোৱাৰ লগতে পাকিস্তানৰ বিৰুদ্ধে আন বহু বৃহৎ পদক্ষেপ গ্ৰহণ কৰি ব্যৱস্থা গ্ৰহণ কৰে। এই সন্দৰ্ভত চুবুৰীয়া দেশত আতংকৰ সৃষ্টি হৈছে আৰু মানুহে শংকাত জীৱন কটাবলগীয়া হৈছে।
শেহতীয়াকৈ পাকিস্তান সেনাধ্যক্ষ অসীম মুনিৰৰ পৰিয়ালে দেশ এৰি থৈ গৈছে আৰু এতিয়া খবৰ উলাইছে যে পাকিস্তানৰ প্ৰাক্তন বৈদেশিক মন্ত্ৰী তথা পাকিস্তান পিপলছ পাৰ্টিৰ মুৰব্বী বিলোৱাল ভুট্টো জৰ্দাৰীৰ পৰিয়ালে পাকিস্তান এৰি কানাডালৈ পলায়ন কৰিছে।
সিন্ধু জল সন্ধি স্থগিত ৰখাৰ পাছত ক্ষুব্ধ বিলোৱালে হুংকাৰ দিছিল যে, পাকিস্তানৰ পানী বন্ধ হ’লে ভাৰতীয়ৰ ৰঙাপানী ব’ব। এই ভাবুকিৰ এদিন পিছতে খবৰ আহে যে তেওঁৰ পৰিয়ালৰ সদস্য বখতাৱাৰ ভুট্টো আৰু আছিফা ভুট্টোৱে ২৭ এপ্ৰিলত পাকিস্তান এৰি কানাডালৈ পলায়ন কৰে।
ভাৰতে যিকোনো সময়তে আক্ৰমণ কৰিব পাৰে বুলি পাকিস্তানৰ ভিতৰত এক আশংকা সৃষ্টি হৈছে। এনে পৰিস্থিতিত পাকিস্তানীৰ সেনাৰো মনোবল কমিছে আৰু বহু বিষয়াই নিজৰ পৰিয়ালক বহিঃৰাজ্যলৈ প্ৰেৰণ কৰিছে।
ইয়াৰ ভিতৰত পাকিস্তানৰ সেনা প্ৰধান অসীম মুনিও অন্তৰ্ভুক্ত। এই লোকসকলে ব্যক্তিগত জেট বিমানেৰে নিজৰ পৰিয়ালক ব্ৰিটেইন আৰু নিউ জাৰ্চিলৈ প্ৰেৰণ কৰাৰ খবৰ আহিছে। পহলগাম সন্ত্ৰাসবাদী আক্ৰমণৰ লগে লগে ভাৰতে আৰব সাগৰত আই এন এছ চুৰাটৰ পৰা ক্ষেপণাস্ত্ৰ পৰীক্ষা কৰি পাকিস্তানক এক শক্তিশালী বাৰ্তা প্ৰদান কৰে। একে সময়তে প্ৰধানমন্ত্ৰী মোদীয়ে লগতে কয় যে সন্ত্ৰাসবাদী আৰু তেওঁলোকৰ মালিকৰ বিৰুদ্ধে কঠোৰ ব্যৱস্থা গ্ৰহণ কৰা হ’ব আৰু তেওঁলোকে পৃথিৱীৰ যিকোনো ঠাইতে আত্মগোপন কৰি নাথাকক কিয়, তেওঁলোকৰ সন্ধান উলিওৱা হ’ব।
পেহেলগাম সন্ত্ৰাসবাদী আক্ৰমণৰ পিছতেই সমগ্ৰ দেশতে পাকিস্তানৰ বিৰুদ্ধে ক্ষোভৰ পৰিৱেশ বিৰাজ কৰিছে আৰু দেশবাসীয়ে প্ৰধানমন্ত্ৰী মোদীৰ পৰাও প্ৰতিশোধৰ দাবী জনাইছে। দেশৰ সকলো ৰাজনৈতিক দলেও এই বিষয়ত চৰকাৰৰ লগত থিয় দিছে। বিৰোধীয়ে কয় যে, চৰকাৰে যি পদক্ষেপ নলওক কিয়, বিৰোধীও চৰকাৰৰ লগত আছে। সম্প্ৰতি চৰকাৰে সিন্ধু জল সন্ধি স্থগিত ৰাখি পাকিস্তানীৰ ভিছা বাতিল কৰি দেশৰ পৰা বহিষ্কাৰ কৰিছে। লগতে পাকিস্তানৰ সৈতে ভাৰতৰ কূটনৈতিক সম্পৰ্কও বহু পৰিমাণে হ্ৰাস পাইছে।
