দেশৰ বিত্ত মন্ত্ৰী নিৰ্মলা সীতাৰমণে ২০২৪-২৫ বিত্তীয় বৰ্ষৰ বাবে অহা ২৩ জুলাইত দাখিল কৰিব পূৰ্ণাংগ বাজেট। বিত্ত মন্ত্ৰীয়ে এই বাজেটত দেশৰ সাধাৰণ মহিলাসকলৰ বাবে ঘোষণা কৰিব পাৰে বহুতো আকৰ্ষণীয় আঁচনিৰ সুবিধা। বিত্ত মন্ত্ৰীৰ এই ঘোষণাৰ ওপৰত জড়িত হৈ আছে দেশৰ কোটি কোটি মহিলাৰ আশা।
উল্লেখ্য যে, চৰকাৰে ২০২৪-২৫ বৰ্ষৰ সাধাৰণ বাজেটত, মহিলাসকলৰ বাবে বহুতো ডাঙৰ ঘোষণা কৰিব পাৰে। য’ত এলপিজিৰ পৰা স্বাস্থ্যসেৱালৈ আগবঢ়াব ৰাজসাহায্য। লগতে মহিলাসকলক শক্তিশালী কৰাৰ বাবে প্ৰচাৰ কৰা হ’ব লাখপতি দিদি আঁচনি। যাৰ ভিতৰত মহিলা উদ্যোগীসকলক কৰ ৰেহাইও প্ৰদান কৰা হ’ব। গতিকে বিত্ত মন্ত্ৰীৰ এই ঘোষণাই সলনি কৰিব পাৰে কোটি কোটি মহিলাৰ জীৱন।
কি হয় এই লাখপতি দিদি আঁচনি?
লাখপতি দিদি আঁচনি হৈছে এক দক্ষতা বিকাশ প্ৰশিক্ষণ আঁচনি। এই আঁচনিখনত মহিলাসকলক দক্ষতাৰ প্ৰশিক্ষণ দি ধন উপাৰ্জনৰ ক্ষমতা প্ৰদান কৰে, যাতে তেওঁলোকে নিজৰ অৰ্থনৈতিক অৱস্থা উন্নত কৰিব পাৰে। মহিলাসকলক আৰ্থিকভাৱে সক্ষম কৰিবলৈ, চৰকাৰে অন্তৱৰ্তীকালীন বাজেট ২০২৪ ত এই আঁচনি প্ৰৱৰ্তন কৰিছিল।
লাখপতি দিদি আঁচনিৰ সহায়ত মহিলাসকলে এবছৰত ১ লাখ বা অধিক উপাৰ্জন কৰিব পাৰে। যাৰ ফলত তেওঁলোকে শিশুৰ বিদ্যালয়ৰ মাচুলৰ পৰা আন ঘৰুৱা খৰচলৈকে স্বামীৰ উপাৰ্জনৰ ওপৰত নিৰ্ভৰ কৰিবলগীয়া নহয়।
বিত্ত মন্ত্ৰী নিৰ্মলা সীতাৰমণে ইতিমধ্যে লাখপতি দিদিৰ পৰিসৰ ২ কোটিৰ পৰা ৩ কোটিলৈ বৃদ্ধি কৰিছে।
এই আঁচনিয়ে দেশৰ বহুতো মহিলাক স্বাৱলম্বী হোৱাত সহায় কৰিছে যদিও দেশৰ কিছু কিছু অঞ্চলত বহুসংখ্যক মহিলা আছে যিয়ে ধনৰ অভাৱত আনকি নিজৰ স্বাস্থ্য সঠিকভাৱে যত্ন ল’ব নোৱাৰে।
এনে পৰিস্থিতিত যেন তেওঁলোকক স্বাস্থ্যসেৱা আৰু এলপিজিৰ দৰে অত্যাৱশ্যকীয় বিষয়ত যাতে ৰাজসাহায্য প্ৰদান কৰা হয় তাৰ বাবে দাবী উত্থাপন কৰে।
গতিকে মহিলাসকলৰ স্বাস্থ্য উন্নত কৰা তথা তেওঁলোকৰ সবলীকৰণৰ কাৰণে কেনেধৰণৰ সিদ্ধান্ত গ্ৰহণ কৰিব সেয়া হ’ব লক্ষ্যণীয়।
