নেশ্যনেল হেৰাল্ডৰ গোচৰত পুনৰ বিপদত গান্ধী পৰিয়াল। দিল্লীৰ ৰাউজ এভিনিউ আদালতে এই গোচৰত ৰাহুল গান্ধী আৰু তেওঁৰ মাতৃ ছোনিয়া গান্ধীক জাননী জাৰি কৰিছে। এইটো ধন সৰবৰাহৰ সৈতে জড়িত ইডিৰ গোচৰ।
ইডিৰ চাৰ্জশ্বীটৰ প্ৰতি লক্ষ্য ৰাখি বিশেষ আদালতৰ ন্যায়াধীশ বিশাল গগনে ছোনিয়া গান্ধী আৰু ৰাহুল গান্ধীৰ বাবে প্ৰডাকচন ৱাৰেণ্ট জাৰি কৰে। যোৱা ১০ বছৰৰ ভিতৰত দ্বিতীয়বাৰৰ বাবে গান্ধী পৰিয়ালে নেশ্যনেল হেৰাল্ডৰ গোচৰত জিলা আদালতত হাজিৰ হ’ব।
নেশ্যনেল হেৰাল্ডৰ গোচৰত ছোনিয়া আৰু তেওঁৰ পুত্ৰ ৰাহুল গান্ধীয়ে ২০১৫ চনৰ ১৯ ডিচেম্বৰত প্ৰথমবাৰৰ বাবে দিল্লীৰ পাটিয়ালা হাউছ কোৰ্টত হাজিৰ হৈ জামিন লাভ কৰিছিল। ২০১৫ চনৰ ৯ ডিচেম্বৰত দিল্লী উচ্চ ন্যায়ালয়ৰ নিৰ্দেশৰ পিছত তেওঁলোক আদালতত হাজিৰ হৈছিল।
ইয়াৰ পিছত এই গোচৰত দুয়োকে ব্যক্তিগতভাৱে আদালতত হাজিৰ হোৱাৰ পৰা ৰেহাই দিয়া হৈছিল। এতিয়া ইডি গোচৰত এই ব্যৱস্থা গ্ৰহণ কৰা হৈছে।
অহা ৮ মে’ত হাজিৰ হ’ব ৰাহুল-ছোনিয়া
আজি ৰাউজ এভিনিউ আদালতে জাননী জাৰি কৰি দুয়োকে ২০২৫ চনৰ ৮ মে’ত হাজিৰ হ’বলৈ নিৰ্দেশ প্ৰদান কৰে। গোচৰৰ পৰৱৰ্তী শুনানি ৮ মে’ৰ বাবে নিৰ্ধাৰণ কৰে।
উল্লেখ্য যে, শেহতীয়াকৈ অভিযোগনামা দাখিল কৰা প্ৰৱৰ্তন সঞ্চালকালয়ে ২০১৪ চনৰ ২৬ জুনত বিজেপি নেতা সুব্ৰমণিয়ম স্বামীয়ে দাখিল কৰা ব্যক্তিগত অভিযোগৰ পিছতেই ২০২১ চনত তদন্ত আৰম্ভ কৰিছিল।
ছোনিয়া, ৰাহুলৰ উপৰি এই গোচৰৰ অভিযুক্তৰ তালিকাত আছে সুমন ডুবে আৰু চেম পেট্ৰ’ডাৰ নাম। ইতিমধ্যে এই গোচৰৰ পৰিপ্ৰেক্ষিতত ৰাহুল-ছোনিয়াৰ কেইবাশ কোটিটকীয়া সম্পত্তি বাজেয়াপ্ত কৰাৰ প্ৰক্ৰিয়াও আৰম্ভ হৈছে।
