ভাৰত-পাকিস্তানৰ মাজত হোৱা যুদ্ধবিৰতিৰ কৃতিত্বৰ দাবী কৰা আমেৰিকাৰ ৰাষ্ট্ৰপতি ড’নাল্ড ট্ৰাম্পে এইবাৰ ৰাছিয়া-ইউক্ৰেইনৰ যুদ্ধ সন্দৰ্ভত কৰিছে ডাঙৰ মন্তব্য। বিশ্ব মঞ্চত নিজকে ‘শান্তিৰ দূত’ হিচাপে প্ৰতিষ্ঠা কৰিবলৈ ট্ৰাম্পে এৰা নাই কোনো ত্ৰুটি।
ৰাছিয়াৰ ৰাষ্ট্ৰপতি ভ্লাদিমিৰ পুটিনৰ সৈতে হোৱা দুঘণ্টীয়া কথা-বতৰাৰ অন্তত ট্ৰাম্পে দাবী কৰে যে মস্কো আৰু কিয়েভে যুদ্ধবিৰতিৰ বাবে আলোচনাত বহিবলৈ সন্মত হৈছে। বৰ্তমানৰ হোৱাইট হাউছৰ মুৰব্বীগৰাকীয়ে মঙলবাৰে ছ’চিয়েল মিডিয়া একাউণ্ট ট্ৰুথৰ জৰিয়তে এই কথা গৌৰৱেৰে ঘোষণা কৰে।
উল্লেখ্য যে, বিগত ৩ বছৰ ধৰি চলি থকা ৰাছিয়া আৰু ইউক্ৰেইনৰ যুদ্ধৰ ফলত দুয়োখন দেশৰ পৰিস্থিতি অধিক ভয়াৱহ হৈ পৰিছে। ড’নাল্ড ট্ৰাম্পে ক্ষমতালৈ অহাৰ লগে লগে দুয়োখন দেশৰ মাজত যুদ্ধবিৰতিৰ বাবে যথেষ্ট তৎপৰতা দেখুওৱা পৰিলক্ষিত হৈছে।
দুয়োখন দেশৰ মাজত চলা যুদ্ধৰ অন্ত পেলাবলৈ মঙলবাৰে ট্ৰাম্পে পুটিনক ফোন কৰিছিল। ইয়াৰ পিছতে ট্ৰাম্পে ছ’চিয়েল মিডিয়াত লিখিছিল, ‘ৰাছিয়াৰ ৰাষ্ট্ৰপতিৰ সৈতে ২ ঘণ্টীয়া কথা-বতৰাৰ অন্ত পৰিল। দ্ৰুত যুদ্ধবিৰতিৰ লক্ষ্যৰে আলোচনা আৰম্ভ হ’ব ৰাছিয়া আৰু ইউক্ৰেইনৰ মাজত। যুদ্ধবিৰতিৰ চৰ্তসমূহ দুয়োখন দেশৰ মাজত আলোচনা কৰা হ’ব।’
এই যুদ্ধৰ অন্ত পৰাৰ পিছত ৰাছিয়াৰ সৈতে অধিক বাণিজ্যৰ বাৰ্তা প্ৰেৰণ কৰাৰ কথাও ট্ৰাম্পে ছ’চিয়েল মিডিয়াযোগে উল্লেখ কৰে।
পুটিনৰ সৈতে হোৱা আলোচনাৰ পিছত ইউক্ৰেইনৰ ৰাষ্ট্ৰপতি জেলেনস্কি, ইউৰোপীয় কমিশ্যনৰ অধ্যক্ষ উৰ্চুলা ভন ডেৰ লেয়েন, ফ্ৰান্স, ইটালী, ফিনলেণ্ডৰ ৰাষ্ট্ৰপতি আৰু জাৰ্মানীৰ চেঞ্চেলৰৰ সৈতেও কথা পতা বুলি জানিব দিয়ে। দাবী কৰা হৈছে যে পোপৰ উপস্থিতিত ভেটিকানত হ’ব পাৰে এই আলোচনা।
ট্ৰাম্পৰ সৈতে হোৱা আলোচনাৰ কথা ৰাছিয়াৰ ৰাষ্ট্ৰপতি পুটিনেও ছ’চিয়েল মিডিয়াৰ জৰিয়তে নিশ্চিত কৰে। তেওঁ লিখিছে, ‘মই সম্ভাৱ্য শান্তি চুক্তিৰ লক্ষ্যৰে আলোচনাত বহিবলৈ সন্মত হৈছো। আমিও ভৱিষ্যতে ইউক্ৰেইনৰ সৈতে কাম কৰিবলৈ সাজু। অৱশ্যে এই চুক্তিৰ চৰ্ত আৰু সময় ঘোষণা কৰিব ৰাছিয়াই।’
পুটিনে লগতে কয় যে এই যুদ্ধবিৰতিৰ ক্ষেত্ৰত ৰাছিয়াৰ স্থিতি অতি স্পষ্ট। সমস্যাৰ মূল কাৰণ বিচাৰি উলিয়াই ইয়াৰ সমাধান আৰু শান্তিৰ দিশত আগবাঢ়ি যোৱা।
