উত্তৰ-পূবৰ কেইবাখনো ৰাজ্যত অবিৰতভাৱে চলি থকা ধাৰাসাৰ বৰষুণৰ ফলত সৃষ্টি হোৱা বানপানী আৰু ভূমিস্খলনৰ পৰিস্থিতিক লৈ গভীৰ উদ্বেগ প্ৰকাশ কৰিছে ড’নাৰ মন্ত্ৰী জ্যোতিৰাদিত্য সিন্ধিয়াই।
মন্ত্ৰীগৰাকীয়ে পৰিস্থিতিৰ ওপৰত তীক্ষ্ণ দৃষ্টি ৰাখিছে আৰু ক্ষতিগ্ৰস্ত ৰাজ্যসমূহলৈ কেন্দ্ৰীয় চৰকাৰৰ পৰা সম্পূৰ্ণ সহায়ৰ আশ্বাস প্ৰদান কৰে। এই সন্দৰ্ভত সিন্ধিয়াই ব্যক্তিগতভাৱে ছিকিম আৰু অসমৰ মুখ্যমন্ত্ৰী আৰু মণিপুৰৰ ৰাজ্যপালৰ সৈতে ফোনযোগে পৰিস্থিতিৰ মূল্যায়ন কৰে আৰু কেন্দ্ৰৰ পৰা সমৰ্থন আগবঢ়োৱাৰ প্ৰতিশ্ৰুতি প্ৰদান কৰে।
ড’নাৰ মন্ত্ৰীগৰাকীয়ে অসমৰ মুখ্যমন্ত্ৰী হিমন্ত বিশ্ব শৰ্মাৰ সৈতে বাৰ্তালাপ কৰি ৰাজ্যখনৰ বিৱৰ্তনশীল পৰিস্থিতিৰ বিষয়ে আলোচনা কৰি সাহায্য আৰু বন্যাৰ্তৰ পুনৰ সংস্থাপনৰ প্ৰচেষ্টাৰ বাবে কেন্দ্ৰৰ পৰা প্ৰয়োজনীয় সকলো সহায়ৰ আশ্বাস দিয়ে।
এই আলোচনাৰ পিছতেই মুখ্যমন্ত্ৰী ড০ হিমন্ত বিশ্ব শৰ্মাই ছ’চিয়েল মিডিয়াত এটা প’ষ্ট কৰি কয়, ‘আজি পুৱা কেন্দ্ৰীয় মন্ত্ৰী জ্যোতিৰাদিত্য সিন্ধিয়া ডাঙৰীয়াই মোক ফোনযোগে অসমৰ সাম্প্ৰতিক বান পৰিস্থিতি সন্দৰ্ভত বুজ লোৱাৰ লগতে কেন্দ্ৰীয় চৰকাৰৰ পৰা সাহায্য আৰু বন্যাৰ্তৰ পুনৰ সংস্থাপনৰ প্ৰচেষ্টাৰ বাবে সকলো ধৰণৰ সহযোগিতাৰ আশ্বাস প্ৰদান কৰে। এই প্ৰত্যাহ্বানমূলক সময়ত তেখেতৰ সঁহাৰিৰ বাবে অসমবাসীৰ হৈ কৃচজ্ঞতা জ্ঞাপন কৰিলো।’
অসমৰ মুখ্যমন্ত্ৰীৰ উপৰি মণিপুৰৰ ৰাজ্যপাল অজয় কুমাৰ ভল্লা আৰু ছিকিমৰ মুখ্যমন্ত্ৰীৰ সৈতেও ৰাজ্যৰ পৰিস্থিতি সন্দৰ্ভত বাৰ্তালাপ কৰি ক্ষতিগ্ৰস্ত লোকসকলক চৰকাৰৰ অদম্য সমৰ্থন পুনৰবাৰ উল্লেখ কৰে।
