ভাৰত চৰকাৰৰ ৰাষ্ট্ৰীয় ভোজ্য তেল অভিযান- তৈল খেজুৰ (NMEO-OP)ৰ অধীনত ১০ জুনত চিৰাং জিলাৰ বড়ো বাজাৰ কৃষি উন্নয়ন চক্ৰৰ অন্তৰ্গত ১ নং চিখাজোৰা গাঁৱত বিস্তৃত তৈল খেজুৰ ৰোপন কাৰ্যসূচী সফলভাৱে অনুষ্ঠিত কৰা হয়।
এই বিস্তৃত তৈল খেজুৰ ৰোপন কাৰ্যসূচী জিলা কৃষি বিভাগ, চিৰাঙৰ উদ্যোগত আৰু 3F Oil palm Pvt. Ltd. ৰ সহযোগত প্ৰগতিশীল কৃষক চনজিত বৰ্মনৰ কৃষি পথাৰত আয়োজন কৰা হয়।
মহকুমা কৃষি বিষয়া উপানন্দ পাটোৱাৰীয়ে আঁত ধৰা বিস্তৃত তৈল খেজুৰ ৰোপন কাৰ্য্যসূচীৰ আনুষ্ঠানিক সভাত চিৰাং জিলা আয়ুক্ত যতীন বৰা, অতিৰিক্ত আয়ুক্ত (কৃষি) অৰিজিত মহাজন, জিলা কৃষি বিষয়া অমৃতলাল নাৰ্জাৰীৰ লগতে শতাধিক স্থানীয় কৃষক ৰাইজ উপস্থিত থাকে।
সভাত ভাষণ প্ৰদান কৰি জিলা আয়ুক্ত গৰাকীয়ে উপস্থিত ৰাইজক তৈল খেজুৰ খেতিৰ বাবে আগবাঢ়ি অহাৰ বাবে আহ্বান জনোৱাৰ লগতে চৰকাৰৰ কৃষিৰ সৈতে জড়িত অন্যান্য আঁচনি সমূহৰ সুবিধা সমূহ লোৱাৰ বাবেও আহ্বান জনায়।
সভাত জিলা কৃষি বিষয়া অমৃতলাল নাৰ্জাৰী আৰু মহকুমা কৃষি বিষয়া উপানন্দ পাটোৱাৰীয়ে উপস্থিত কৃষক ৰাইজক কৃষি বিভাগৰ বহুকেইখন আঁচনি সম্পৰ্কে অৱগত কৰে।
উল্লেখ্য যে এই বিস্তৃত ৰোপন কাৰ্য্যসূচীৰ মূল উদ্দেশ্য হৈছে তৈল খেজুৰ খেতিৰ জৰিয়তে কৃষকৰ আয় দুগুণ কৰা, ভোজ্য তেলৰ ক্ষেত্ৰত আত্মনিৰ্ভৰশীলতা বৃদ্ধি কৰা। এই কাৰ্য্যসূচীত উপস্থিত ৰাইজৰ মাজত কৃষি ক্ষেত্ৰত কেনেদৰে ড্ৰোণ প্ৰযুক্তি ব্যৱহাৰ কৰা হয় তাৰো এক প্ৰদৰ্শনী কৰা হয়।
