বিগত ২০ মাহ ধৰি গাজাত ইজৰাইলৰ সামৰিক অভিযানে অঞ্চলটো বিধ্বস্ত কৰি তুলিছে। গাজাৰ স্বাস্থ্য মন্ত্ৰালয়ৰ তথ্য অনুসৰি, ২০২৩ চনৰ ৭ অক্টোবৰত হামাছৰ আক্ৰমণৰ পিছত আৰম্ভ হোৱা যুদ্ধত এতিয়ালৈকে ৫৫ হাজাৰতকৈ অধিক পেলেষ্টাইনীৰ মৃত্যু হৈছে।
গাজাৰ ২৩ লাখ জনসংখ্যাৰ প্ৰায় ৮০% লোক স্থানচ্যুত হৈছে, আৰু ৰাষ্ট্ৰসংঘই সকীয়াই দিছে যে এই অঞ্চলটো দুৰ্ভিক্ষৰ আশংকাত আছে।
গাজা ষ্ট্ৰিপৰ দক্ষিণৰ খান ইউনিছ চহৰত ইজৰাইলৰ টেংক গোলাবৰ্ষণত কমেও ৪৫ জন পেলেষ্টাইনী নাগৰিক নিহত হোৱাৰ লগতে শতাধিক লোক আহত হয়। এই দাবী কৰিছে হামাছৰ দ্বাৰা পৰিচালিত গাজা স্বাস্থ্য মন্ত্ৰালয়ে।
মন্ত্ৰালয়ৰ মতে, আল-তাহলিয়া ছেক্সনত খাদ্যৰ দৰে মানৱীয় সাহায্য কঢ়িয়াই অনা ট্ৰাকৰ বাবে অপেক্ষা কৰি থকা অৱস্থাত এই আক্ৰমণ সংঘটিত হয়। আহতসকলৰ বহুতৰে অৱস্থা সংকটজনক হোৱাত মৃত্যুৰ সংখ্যা বৃদ্ধি পোৱাৰ সম্ভাৱনা আছে।
স্বাস্থ্য মন্ত্ৰালয়ৰ এক বিবৃতি অনুসৰি, খান ইউনিছত হাজাৰ হাজাৰ লোকে খাদ্য আৰু অন্যান্য অত্যাৱশ্যকীয় সামগ্ৰীৰ বাবে অপেক্ষা কৰি থকা ৰাইজৰ ওপৰত নিৰ্বিচাৰে গুলীচালনা কৰে ইজৰাইলৰ টেংকে। মন্ত্ৰালয়ে জনোৱা অনুসৰি, আক্ৰমণত বহু গুৰুতৰভাৱে আহত লোকক নাছৰ চিকিৎসালয় আৰু অন্যান্য চিকিৎসা কেন্দ্ৰলৈ ততাতৈয়াকৈ প্ৰেৰণ কৰে, য’ত চিকিৎসা কৰ্মীয়ে সীমিত সম্পদেৰে তেওঁলোকৰ চিকিৎসাৰ চেষ্টা চলাইছে।
ইজৰাইলৰ সেনাই এই সন্দৰ্ভত তাৎক্ষণিকভাৱে কোনো আনুষ্ঠানিক মন্তব্য কৰা নাই। কিন্তু শেহতীয়াকৈ অনুৰূপ কাণ্ডত ইজৰাইলে দাবী কৰিছিল যে তেওঁলোকৰ সৈন্যই কেৱল “সতৰ্কবাণীমূলক গুলী” বা “সন্দেহযুক্ত” লোকৰ ওপৰতহে গুলীচালনা কৰিছে।
বিগত কেইটামান সপ্তাহত গাজাৰ সাহায্য বিতৰণ স্থানৰ ওচৰত এনে কেইবাটাও কাণ্ড সংঘটিত হৈছে, য’ত ইজৰাইলী বাহিনীয়ে হামাছে সাহায্য চুৰি কৰাৰ অভিযোগ উত্থাপন কৰিছে, যিটো হামাছে নাকচ কৰিছে।
