উপৰ্যুপৰি কৰ্তব্যত গাফিলতিৰ পৰিণতিত এয়াৰ ইণ্ডিয়াৰ তিনিগৰাকী শীৰ্ষ কাৰ্যবাহীয়ে চাকৰি হেৰুৱালে। এই তিনিওজন বিষয়াৰ বিৰুদ্ধে দীৰ্ঘ সময়জুৰি কৰ্তব্যত খেলিমেলি কৰাৰ গুৰুতৰ অভিযোগ তুলি অসামৰিক বিমান পৰিবহণ সঞ্চালকালয়ে এই কঠোৰ সিদ্ধান্ত গ্ৰহণ কৰে।
অভিয়োগ প্ৰতিপন্ন হোৱাৰ পৰিপ্ৰেক্ষিতত কেন্দ্ৰীয় চৰকাৰৰ নিৰ্দেশনাৰ ভিত্তিত অসামৰিক বিমান পৰিবহণ সঞ্চালকালয়ে এই তিনি শীৰ্ষ বিষয়াক অবিলম্বে চাকৰিৰ পৰা বৰ্খাস্তৰ নিৰ্দেশনা জাৰি কৰে।
উল্লেখ্য যে, এই বিষয়াকেইজনৰ ওপৰত ন্যস্ত আছিল বিমানকৰ্মীৰ সময়সূচী নিৰ্ধাৰণৰ দায়িত্ব। কিন্তু দীৰ্ঘ সময় ধৰি এই কামত গাফিলতি কৰি আহিছিল সংশ্লিষ্ট বিষয়া কেইজনে।
উত্থাপিত অভিযোগ অনুসৰি, এই বিষয়াকেইজনে বাধ্যতামূলকভাৱে কিছুমান কৰ্মচাৰীক কামত খটুৱাইছিল। কেৱল এয়াই নহয় কিছুমানক অনুজ্ঞাপত্ৰ অবিহনেই বিমানত কৰ্তব্য দিয়াৰো অভিযোগ আছে।
ইয়াৰ উপৰি অত্যধিক কামৰ হেচাত কিছু বিমান কৰ্মীয়ে পোৱা নাছিল বিশ্ৰামৰ পৰ্যাপ্ত সময়। অনুসন্ধানৰ অন্তত সম্প্ৰতি পোহৰলৈ আহিছে এইবোৰ অনিয়মৰ তথ্য।
অসামৰিক বিমান পৰিবহণ সঞ্চালকালয়ৰ কোপদৃষ্টিত পৰা এয়াৰ ইণ্ডিয়াৰ তিনি শীৰ্ষ বিষয়া হৈছে এয়াৰ ইণ্ডিয়াৰ ডিভিজনেল ভাইচ প্ৰেচিডেণ্ট চূড়া সিংহ, ডিৰেক্টৰেট অৱ অপাৰেশ্যনছ ক্ৰিউ চিডিয়ুলিঙৰ চীফ মেনেজাৰ পিংকি মিট্টাল আৰু ক্ৰিউ চিডিয়ুলিং প্লেনিঙৰ পায়েল আৰোৰা।
এই তিনি বিষয়াই মানি চলা নাছিল বিভাগীয় নীতি-নিৰ্দেশনা। এয়াৰ ইণ্ডিয়াৰ বিমানকর্মী সকলৰ সময়সূচী নিৰ্ধাৰণৰ দায়িত্বত আছিল এই তিনি বিষয়া।
উল্লেখ্য যে, ১২ জুনত আহমেদাবাদ বিমানবন্দৰৰ পৰা লণ্ডনলৈ উৰা মৰা এয়াৰ ইণ্ডিয়াৰ বিমানখনে দুৰ্ঘটনাত পতিত হৈছিল। এই দুৰ্ঘটনাত ২৪২ গৰাকী যাত্ৰীৰ ভিতৰত ২৪১ গৰাকীৰে মৃত্যু হৈছিল। ইয়াৰ উপৰি আন একাংশ লোকো এই দুৰ্ঘটনাত মৃত্যুমুখত পৰিছিল।
