ইৰাণৰ তিনিটা প্ৰধান পাৰমাণৱিক স্থানত আমেৰিকাৰ সামৰিক আক্ৰমণক তীব্ৰ গৰিহণা দি পাকিস্তানৰ বৈদেশিক মন্ত্ৰালয়ে এক আনুষ্ঠানিক বিবৃতি প্ৰকাশ কৰিছে। বৈদেশিক মন্ত্ৰালয়ে কয় যে, ইৰাণৰ সাৰ্বভৌমত্বৰ ওপৰত এই আক্ৰমণ আঞ্চলিক শান্তি আৰু স্থিতিশীলতাৰ বাবে এক গুৰুতৰ ভাবুকি।
শেহতীয়াকৈ আমেৰিকাই ইৰাণৰ পাৰমাণৱিক স্থানত কৰা আক্ৰমণক লৈ পাকিস্তানে গভীৰ উদ্বেগ প্ৰকাশ কৰিছে। পাকিস্তানৰ বৈদেশিক মন্ত্ৰালয়ে কয় যে, এই আক্ৰমণসমূহ ইতিমধ্যে চলি থকা ইজৰাইলৰ কাৰ্যকলাপৰ অংশ আৰু ইয়াৰ ফলত অঞ্চলটোত উত্তেজনা আৰু হিংসাত্মক পৰিস্থিতি আৰু অধিক বৃদ্ধি পাব পাৰে। পাকিস্তানৰ মতে এই পৰিস্থিতি কেৱল মধ্যপ্ৰাচ্যৰ শান্তি আৰু স্থিতিশীলতাৰ বাবেই নহয়, সমগ্ৰ বিশ্বৰ বাবেও বিপদজনক।
পাকিস্তানে স্পষ্টকৈ কৈছিল যে এই আক্ৰমণে আন্তঃৰাষ্ট্ৰীয় আইনৰ সকলো নিয়ম আৰু ৰাষ্ট্ৰসংঘৰ চনদ উলংঘা কৰিছে। ইৰাণৰ নিজৰ ৰক্ষাৰ সম্পূৰ্ণ অধিকাৰ আছে আৰু ইয়াৰ ওপৰত এনে আক্ৰমণ কোনো কাৰণতে ন্যায্য হ’ব নোৱাৰে। আন্তঃৰাষ্ট্ৰীয় নিয়মৰ বিৰুদ্ধে এয়া এক বিপজ্জনক পদক্ষেপ।
বিবৃতিটোত পাকিস্তানে সকলো দেশকে সাধাৰণ নাগৰিকৰ জীৱন আৰু সম্পত্তিক সন্মান জনোৱাৰ লগতে যুদ্ধসদৃশ কাৰ্য শীঘ্ৰে বন্ধ কৰিবলৈ আহ্বান জনাইছে। লগতে সকলো পক্ষকে আন্তঃৰাষ্ট্ৰীয় আইন, বিশেষকৈ মানৱ অধিকাৰ আইন মানি চলিবলৈ পৰামৰ্শ দিয়া হৈছে। পাকিস্তানে জোৰ দি কয় যে, বৰ্তমানৰ সংকটৰ সমাধান কেৱল আলোচনা আৰু কূটনীতিৰ জৰিয়তেহে সম্ভৱ আৰু ইয়াৰ বাবে ৰাষ্ট্ৰসংঘৰ চনদৰ নীতিসমূহ পালন কৰাটো প্ৰয়োজনীয়।
