ইৰাণ আৰু ইজৰাইলে যুদ্ধবিৰতি উলংঘন কৰাৰ বিস্ফোৰক অভিযোগ উত্থাপন কৰিছে আমেৰিকাৰ ৰাষ্ট্ৰপতি ড’নাল্ড ট্ৰাম্পে। মাৰ্কিন ৰাষ্ট্ৰপতিগৰাকীয়ে দুয়োখন দেশকে যুদ্ধবিৰতি উলংঘন নকৰিবলৈ আহ্বান জনায়।
এই আহ্বানৰ মাজতে আমেৰিকাই ইজৰাইলক সকীয়নি প্ৰদান কৰি ট্ৰাম্পে কয়, ‘ইৰাণত বোমা বৰ্ষণ নকৰিব। এনেকুৱা কৰিলে যুদ্ধবিৰতি উলংঘন কৰা হ’ব। শীঘ্ৰে নিজৰ পাইলটসকলক ঘূৰাই আনক।’
ছ’চিয়েল মিডিয়া প্লেটফৰ্ম ট্ৰুথৰ জৰিয়তে ইজৰাইলক এই সকীয়নি প্ৰদান কৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে।
ট্ৰাম্পে লগতে কয়, ‘ইৰাণৰ পাৰমাণৱিক শক্তি শেষ হৈছে। তেহৰাণে আৰু কেতিয়াও নিজৰ পাৰমাণৱিক কাৰ্যসূচী পুনৰ নিৰ্মাণ নকৰে।’
নাটো শিখৰ সন্মিলনত অংশ ল’বলৈ যোৱাৰ পূৰ্বে ট্ৰাম্পে ইজৰাইল আৰু ইৰাণ দুয়ো পক্ষক লৈ সুখী নহয় বুলি মন্তব্য কৰে।
উল্লেখ্য যে, ইয়াৰ পূৰ্বে ট্ৰাম্পে ইৰাণ আৰু ইজৰাইলৰ মাজত যুদ্ধবিৰতি প্ৰযোজ্য হোৱা বুলি উল্লেখ কৰিছিল। তেওঁ লগতে দুয়োখন দেশকে যুদ্ধবিৰতি উলংঘন নকৰিবলৈ আহ্বান জনাইছিল।
ট্ৰাম্পে কয়, ‘ইজৰাইল আৰু ইৰাণে মোৰ ওচৰলৈ প্ৰায় একে সময়তে আহি শান্তিৰ বিষয়ে কয়… মই জানিছিলোঁ যে সময় আহি পৰিছে। বিশ্ব আৰু মধ্যপ্ৰাচ্যই প্ৰকৃত বিজয়ী। দুয়োখন ৰাষ্ট্ৰই নিজৰ ভৱিষ্যতত প্ৰেম, শান্তি আৰু সমৃদ্ধি দেখিব।’
