ঈদৰ সময়ত ধুবুৰীৰ এটা মন্দিৰৰ সন্মুখত নিষিদ্ধ মাংস পেলোৱাক কেন্দ্ৰ কৰি সৃষ্টি হোৱা উত্তপ্ত পৰিস্থিতিৰ পিছতেই তৎপৰতা গ্ৰহণ কৰা অসম আৰক্ষীয়ে এই পৰ্যন্ত ১৫০ জনতকৈ অধিক লোকক গ্ৰেপ্তাৰ কৰিছে। ইফালে এই সমগ্ৰ ঘটনাৰ মূল মাষ্টাৰমাইণ্ডকো চিনাক্ত কৰা হৈছে বুলি মঙলবাৰে জানিব দিয়ে মুখ্যমন্ত্ৰী ড০ হিমন্ত বিশ্ব শৰ্মাই।
উল্লেখ্য যে ঈদৰ পিছৰে পৰা জিলাখনত সৃষ্টি হোৱা সাম্প্ৰদায়িক উত্তেজনাৰ পিছতে ১০ দিনৰ ভিতৰত দ্বিতীয়বাৰৰ বাবে ধুবুৰী ভ্ৰমণ কৰি মুখ্যমন্ত্ৰী শৰ্মাই আইন-শৃংখলাৰ পৰিস্থিতিৰ পৰ্যালোচনা কৰে।
আজি ধুবুৰীত উপস্থিত হৈ মুখ্যমন্ত্ৰী শৰ্মাই কয় যে এই স্পৰ্শকাতৰ জিলাখনত নিৰাপত্তা যন্ত্ৰ শক্তিশালী কৰাৰ বাবে ভাৰতীয় সেনাৰ স্থায়ী ঘাটি স্থাপনৰ বিকল্পও ৰাজ্য চৰকাৰে চিন্তা-চৰ্চা কৰি আছে।
শৰ্মাই কয় যে ১৩ জুনৰ পৰা ৰাজ্যৰ বাহিৰৰ পৰা ১১ জনকে ধৰি ১৫০ জনতকৈ অধিক ‘অসামাজিক কাৰ্য’ত জড়িত থকা লোকক গ্ৰেপ্তাৰ কৰা হৈছে।
মন্দিৰৰ সন্মুখত নিষিদ্ধ মাংস নিক্ষেপ কৰাত জড়িত মাষ্টাৰ মাইণ্ডকো চিনাক্ত কৰা হৈছে বুলিও শৰ্মাই কয়। তেওঁ কয়, ‘মাষ্টাৰ মাইণ্ডজনক মিণ্টু আলী বুলি চিনাক্ত কৰা হৈছে। বৰ্তমান তেওঁ পলাতক হৈ আছে আৰু তেওঁ শীঘ্ৰে আত্মসমৰ্পণ কৰিব লাগে।’
উল্লেখ্য যে, জিলাখনত যাতে আৰু কোনো ধৰণৰ বিক্ষিপ্ত ঘটনা সংঘটিত নহয় তাৰ বাবে আৰক্ষী-প্ৰশাসনে যাৱতীয় ব্যৱস্থা গ্ৰহণ কৰা বুলিও মুখ্যমন্ত্ৰী শৰ্মাই উল্লেখ কৰে।
