ইণ্ডিয়ান প্ৰিমিয়াৰ লীগ চমুকৈ আই পি এলত ৰয়েল চেলেঞ্জাৰ্ছ বাংগালুৰু (আৰ চি বি)ৰ হৈ খেলা বাওঁহতীয়া বেগী বলাৰ যশ দয়ালৰ নাম বিতৰ্কত সোমাই পৰিছে। ক্ৰিকেটাৰগৰাকীৰ বিৰুদ্ধে এগৰাকী মহিলাই মানসিক আৰু শাৰীৰিক নিৰ্যাতনৰ অভিযোগ উত্থাপন কৰিছে।
মহিলা গৰাকীয়ে ক্ৰিকেটাৰ যশ দয়ালৰ বিৰুদ্ধে যৌন নিৰ্যাতনৰ অভিযোগ উত্থাপন কৰিছে। এই সন্দৰ্ভত আই জি আৰ এছ পৰ্টেলত অভিযোগ কৰিছে ভুক্তভোগীয়ে। মহিলাগৰাকীয়ে গাজিয়াবাদত আই জি আৰ এছত এজাহাৰ দাখিল কৰাৰ পিছতে আৰক্ষীয়েও তদন্ত আৰম্ভ কৰে।
উল্লেখ্য যে যশ দয়ালক মানসিক আৰু শাৰীৰিক নিৰ্যাতনৰ অভিযোগ উত্থাপন কৰা মহিলাগৰাকী গাজিয়াবাদৰ ইন্দিৰাপুৰমৰ বাসিন্দা।
মহিলাগৰাকীৰ এই অভিযোগ মুখ্যমন্ত্ৰী যোগী আদিত্যনাথৰ কাৰ্যালয়েও লাভ কৰিছে। এই সমগ্ৰ বিষয়ত উচ্চ কৰ্তৃপক্ষৰ পৰা তদন্তৰ দাবী জনাইছে ভুক্তভোগী মহিলাগৰাকীয়ে।
অভিযোগ অনুসৰি যোৱা ৫ বছৰ ধৰি যশ দয়ালৰ সৈতে সম্পৰ্কত আছিল ভুক্তভোগী মহিলাগৰাকী। অভিযোগত উল্লেখ কৰা হৈছে যে যশ দয়ালে তেওঁক শাৰীৰিক আৰু মানসিকভাৱে হাৰাশাস্তি কৰিছিল। ক্ৰিকেটাৰগৰাকীৰ আন বহু ছোৱালীৰ সৈতেও সম্পৰ্ক আছিল বুলি অভিযোগ উত্থাপন কৰিছে যুৱতীগৰাকীয়ে। বৰ্তমান আৰক্ষীয়ে সমগ্ৰ বিষয়টোৰ তদন্ত আৰম্ভ কৰিছে।
