মঙলবাৰে ধুবুৰী জিলাত ৰাজ্য চৰকাৰে অবৈধভাৱে দখল কৰি থকা ভূমি মুক্ত কৰাৰ বাবে বৃহৎ উচ্ছেদ অভিযান আৰম্ভ কৰে। এই উচ্ছেদৰ সময়তে দখলকাৰীসকলে উত্তেজনাময় পৰিৱেশৰ সৃষ্টি কৰি নিৰাপত্তা বাহিনীক আক্ৰমণ কৰাৰ ভয়ংকৰ অভিযোগ উত্থাপন হৈছে। আৰক্ষীয়ে জানিব দিয়া অনুসৰি, বৰ্তমান পৰিস্থিতি নিয়ন্ত্ৰণলৈ অনা হৈছে।
উল্লেখ্য যে, ৰাজ্য চৰকাৰে দুখন জিলাত হাজাৰ-হাজাৰ সন্দেহজনক লোকে দখল কৰি থকা ৫৪০ হেক্টৰৰো অধিক চৰকাৰী ভূমি দখলমুক্ত কৰাৰ বাবে আৰম্ভ কৰিছে উচ্ছেদ অভিযান। এই অভিযানৰ ফলত প্ৰায় ২৫০০ পৰিয়াল গৃহহীন হোৱাৰ সম্ভাৱনা আছে।
এই অভিযানৰ অংশ স্বৰূপে মঙলবাৰে প্ৰশাসনে ধুবুৰীৰ তিনিখন ৰাজহ গাঁৱৰ ৩ হাজাৰ বিঘা মাটি মুকলি কৰিবলৈ তাৰ পৰা ১২০০-১৪০০ পৰিয়ালক উচ্ছেদ কৰাৰ পৰিকল্পনা কৰিছিল।
আনহাতে বৃহস্পতিবাৰ বা তাৰ পিছত গোৱালপাৰাত প্ৰায় ১১০০ পৰিয়ালক স্থানচ্যুত কৰাৰ বাবে অনুৰূপ অভিযান আৰম্ভ কৰা হ’ব। প্ৰায় ১০৪০ বিঘা বনভূমি মুক্ত কৰাৰ বাবে এই অভিযান চলাব প্ৰশাসনে।
ইফালে আৰক্ষীৰ এটা সূত্ৰই জানিব দিয়া অনুসৰি আজি চলোৱা উচ্ছেদ অভিযানৰ সময়ত একাংশ লোকে আৰক্ষীৰ সৈতে কাজিয়াত লিপ্ত হৈছিল। এই সময়ত বহু সা-সৰঞ্জাম ক্ষতিগ্ৰস্ত হয়।
