বৃহস্পতিবাৰে লোকসেৱা ভৱনত মুখ্যমন্ত্ৰী ড০ হিমন্ত বিশ্ব শৰ্মাৰ অধ্যক্ষতাত অনুষ্ঠিত হয় ৰাজ্যিক কেবিনেটৰ গুৰুত্বপূৰ্ণ বৈঠক। এই বৈঠকত কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হয়।
বৈঠকৰ অন্তত ৰাজ্যিক কেবিনেটে গ্ৰহণ কৰা সিদ্ধান্তসমূহ সংবাদমেলৰ জৰিয়তে সদৰী কৰে মুখ্যমন্ত্ৰী ড০ হিমন্ত বিশ্ব শৰ্মাই।
কেবিনেটে লোৱা গুৰুত্বপূৰ্ণ সিদ্ধান্ত সমূহ তলত উল্লেখ কৰা হ’ল-
ব্যক্তিগত হাস্পতালত বিশেষ বলপূৰ্বক অনুশীলন ৰোধৰ ব্যৱস্থা
এই সিদ্ধান্ত অনুসৰি এতিয়াৰে পৰা ব্যক্তিগত হাস্পতালসমূহে চিকিৎসা ব্যয় পৰিশোদ কৰিবলৈ বাকী থাকিলেও ৰোগীৰ মৃত্যুৰ প্ৰামাণীকৰণৰ ২ ঘণ্টাৰ ভিতৰত যিকোনো অৱস্থাত মৃতদেহ পৰিয়ালক হস্তান্তৰ কৰিব লাগিব। এই সময়সীমা অতিক্ৰম কৰিলে হাস্পতালখনৰ বিৰুদ্ধে দণ্ডনীয় কাৰ্যব্যৱস্থা গ্ৰহণ কৰা হ’ব পাৰে আৰু ৪ ঘণ্টাৰ ভিতৰত ঘটনাটো আৰক্ষী আৰু জিলা স্বাস্থ্য কৰ্তৃপক্ষক অৱগত কৰিব লাগিব।
দোষী হাস্পতালসমূহৰ অনুজ্ঞাপত্ৰ ৩-৬ মাহলৈ স্থগিত হ’ব পাৰে, ৫ লাখ টকালৈকে জৰিমনা, ব্লেকলিষ্ট কৰা হ’ব পাৰে অথবা অপৰাধৰ পুনৰাবৃত্তিৰ ক্ষেত্ৰত স্থায়ীভাৱে পঞ্জীয়ন বাতিল হ’ব পাৰে।
উদাসীন ভকতলৈ আৰ্থিক সহায়
কেবিনেটে অসমৰ সত্ৰসমূহত বাস কৰা যোগ্য উদাসীন ভকতক প্ৰতিমাহে ১৫০০ টকাৰ আৰ্থিক সহায় প্ৰদানৰ বাবে অনুমোদন জনাইছে।
পৰীক্ষাৰ প্ৰস্তুতিৰ বাবে ছাত্ৰ-ছাত্ৰীসকলক প্ৰেৰণা আঁচনিৰে অনুপ্ৰেৰণা
আজিৰ কেবিনেটে প্ৰেৰণা আঁচনি কাৰ্যকৰী কৰাৰ বাবে অনুমোদন জনাইছে। এই আঁচনিৰ অধীনত অসম ৰাজ্যিক বিদ্যালয় শিক্ষা পৰিষদৰ অধীনস্থ সকলো বিদ্যালয়ত অধ্যয়ন কৰা দশম শ্ৰেণীৰ ছাত্ৰ-ছাত্ৰীৰ বাবে ২০২৫ চনৰ ১ নৱেম্বৰৰ পৰা ২০২৬ চনৰ হাইস্কুল শিক্ষান্ত পৰীক্ষালৈকে প্ৰতি মাহে ৩০০ টকাৰ আৰ্থিক অনুমোদন আগবঢ়াব।
অংগনৱাড়ী কৰ্মী আৰু সহায়িকাৰ ভাট্টা বৃদ্ধি
কেবিনেটে ২০২৫ চনৰ ১ অক্টোবৰৰ পৰা অংগনৱাড়ী কৰ্মী আৰু সহায়িকাৰ ৰাজ্যিক উদগনিমূলক ভাট্টা ক্ৰমে ১৫০০ আৰু ৭৫০ টকালৈ বৃদ্ধিত অনুমোদন জনোৱা হৈছে। এই বৃদ্ধিৰ ফলত অংগনৱাড়ী কৰ্মীয়ে মাহে ৮ হাজাৰ টকা আৰু সহায়িকাই ৪ হাজাৰ টকাকৈ লাভ কৰিব।
গাঁওপ্ৰধানৰ ভাট্টা বৃদ্ধি
কেবিনেটে গাঁওপ্ৰধানৰ মাহিলি ভাট্টা ৯ হাজাৰ টকাৰ পৰা বৃদ্ধি ১৪ হাজাৰ টকা কৰাৰ অনুমোদন জনাইছে। এই বৰ্ধিত হাৰ চলিত বৰ্ষৰ ১ অক্টোবৰৰ পৰা প্ৰযোজ্য হ’ব।
