ক্ৰমান্বয়ে সংকুচিত হৈ অহা বনাঞ্চলৰ পৰা খাদ্যৰ সন্ধানত ওলাই অহা বনৰীয়া হাতীৰ আক্ৰমণত এইবাৰ প্ৰাণ হেৰুৱালে চামগুৰিৰ এজন যুৱকে। চামগুৰিৰ উদমাৰী চাহ বাগিচাৰ পুৰণা লাইনত বনৰীয়া হাতীৰ আক্ৰমণত মৃত্যু হয় ৩০ বছৰীয়া যুৱকজনৰ।
নিহত যুৱক জন সেই অঞ্চলটোৰে মহেশ্বৰ কৰ্মকাৰ বুলি জানিব পৰা গৈছে।
স্থানীয় লোকসকলে প্ৰকাশ কৰা অনুসৰি, নিহত যুৱকজনে ঘৰৰ সমীপৰে জংঘলত গৰু বিচাৰি যাওতে খাদ্যৰ সন্ধানত লোকালয়লৈ ওলাই অহা এটা বনৰীয়া হাতীৰ আক্ৰমণৰ সন্মুখীন হয়। এই আক্ৰমণত থিতাতেই মৃত্যু হয় ৩০ বছৰীয়া কৰ্মকাৰৰ।
এই কৰুণ ঘটনাৰ খবৰ লাভ কৰাৰ পিছতে ঘটনাস্থলত উদমাৰী বন বিভাগৰ লগতে চামগুৰি আৰক্ষী উপস্থিত হৈ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে নগাঁও মেডিকেল কলেজ হাস্পতাললৈ প্ৰেৰণ কৰে।
আনহাতে এই ঘটনাৰ পাছত স্থানীয় ৰাইজে বন বিভাগৰ নীৰৱ ভূমিকাৰ প্ৰতি বৃহৎ প্ৰশ্ন উত্থাপন কৰে। দীৰ্ঘদিন ধৰি অঞ্চলটোত বনৰীয়া হাতীয়ে সন্ত্ৰাস চলাই অহাৰ পিছতো স্থানীয় প্ৰশাসন তথা বন বিভাগে কোনো যাৱতীয় ব্যৱস্থা গ্ৰহণ কৰা নাই বুলি স্থানীয় লোকে অভিযোগ উত্থাপন কৰিছে।
