বৰ্তমান উচ্চ কলেষ্টেৰ’লৰ সমস্যা দ্ৰুতগতিত বাঢ়িছে। এই অৱস্থাত শৰীৰত কলেষ্টেৰ’লৰ মাত্ৰা স্বাভাৱিকতকৈ বেছি হৈ পৰে। দীৰ্ঘদিন ধৰি যত্ন লোৱা নহ’লে হাৰ্ট এটেক, ষ্ট্ৰোক, ৰক্তচাপ আদি গুৰুতৰ ৰোগ হ’ব পাৰে। শৰীৰৰ বাবে কলেষ্টেৰ’ল প্ৰয়োজনীয় যদিও অতিৰিক্তভাৱে বৃদ্ধি পালে বিপদজনক হৈ পৰে।
কলেষ্টেৰ’ল বৃদ্ধি কৰা অভ্যাস-
- অধিক জাংক ফুড খোৱা
বজাৰত উপলব্ধ ফাষ্ট ফুড আৰু ডিপ ফ্ৰাইড সামগ্ৰীত ট্ৰেন্স ফেট আৰু চেচুৰেটেড ফেট প্ৰচুৰ পৰিমাণে থাকে। বাৰ্গাৰ, পিজ্জা, ফ্ৰেঞ্চ ফ্ৰাই আৰু পেক কৰা জলপান বাৰে বাৰে খালে শৰীৰত কলেষ্টেৰ’ল (LDL)ৰ মাত্ৰা বৃদ্ধি পায়।
- অত্যধিক মিঠা আৰু পৰিশোধিত কাৰ্ব
মিঠা বস্তু, ঠাণ্ডা পানীয়, কেক আৰু বগা ৰুটিত উচ্চ চেনি থাকে, যাৰ ফলত তেজৰ চেনি বৃদ্ধি হোৱাৰ লগতে কলেষ্টেৰ’লৰ মাত্ৰাও প্ৰভাৱিত হয়।
- শাৰীৰিক ব্যায়ামৰ অভাৱ
গোটেই দিনটো বহি থকা, ব্যায়াম নকৰা আৰু শাৰীৰিক কাৰ্য্যকলাপৰ অভাৱো কলেষ্টেৰ’ল বৃদ্ধিৰ প্ৰধান কাৰণ। শাৰীৰিক কাৰ্যকলাপৰ অভাৱত শৰীৰত চৰ্বি জমা হয়, যাৰ ফলত এল ডি এল বৃদ্ধি পায় আৰু এইচ ডি এল (ভাল কলেষ্টেৰল) হ্ৰাস পায়।
- ধূম্ৰপান আৰু মদ্যপান
ধূম্ৰপানে কেৱল হৃদযন্ত্ৰৰ স্বাস্থ্যৰ ক্ষতি কৰাই নহয়, ভাল কলেষ্টেৰ’ল (HDL)ও হ্ৰাস কৰে। একে সময়তে অত্যধিক মদ্যপানে ট্ৰাইগ্লিচাৰাইড বৃদ্ধি কৰে।
- মানসিক চাপ আৰু টোপনিৰ অভাৱ
অহৰহ মানসিক চাপ আৰু টোপনিৰ অভাৱেও কলেষ্টেৰ’লৰ মাত্ৰাত প্ৰভাৱ পেলায়। মানসিক চাপৰ সময়ত শৰীৰত কৰ্টিছল হৰম’ন বৃদ্ধি পায়, যাৰ ফলত লিপিডৰ বিপাকীয় ক্ৰিয়া বেয়া হয়।
কলেষ্টেৰ’ল নিয়ন্ত্ৰণৰ বাবে এই পদক্ষেপসমূহ গ্ৰহণ কৰা উচিত-
খাদ্যাভ্যাসৰ সলনি– সেউজীয়া শাক-পাচলি, ফল-মূল, ওটছ, ব্ৰাউন ৰাইচ আৰু হাই ফাইবাৰ ডায়েট অন্তৰ্ভুক্ত কৰিব লাগে। তেলীয়া আৰু ডিপ ফ্ৰাইড খাদ্য কমকৈ খাব লাগে। চেচুৰেটেড ফেটৰ পৰিৱৰ্তে অলিভ অইল, ফ্লেক্স ছিড আৰু বাদাম আদি স্বাস্থ্যকৰ চৰ্বি গ্ৰহণ কৰিব লাগে।
নিয়মীয়াকৈ ব্যায়াম– দৈনিক কমেও ৩০ মিনিট খোজ কঢ়া বা যোগাসন কৰাটো জৰুৰী। নিয়মিত শাৰীৰিক কাৰ্য্যকলাপে এইচ ডি এল বৃদ্ধি কৰে আৰু এল ডি এল হ্ৰাস কৰে।
ধূম্ৰপান আৰু মদ্যপান পৰিহাৰ– ধূম্ৰপান আৰু মদ্যপান এৰিলে উচ্চ কলেষ্টেৰল নিয়ন্ত্ৰণৰ আটাইতকৈ ফলপ্ৰসূ উপায়।
মানসিক চাপ পৰিচালনা– ধ্যান, উশাহ-নিশাহৰ ব্যায়াম আৰু পৰ্যাপ্ত টোপনিৰ দ্বাৰা মানসিক চাপ নিয়ন্ত্ৰণ কৰিব লাগে।
উচ্চ কলেষ্টেৰ’লক আওকাণ কৰাটো বিপজ্জনক বুলি প্ৰমাণিত হ’ব পাৰে। ভুল খাদ্যাভ্যাস, অস্বাস্থ্যকৰ জীৱনশৈলী আৰু মানসিক চাপ ইয়াৰ মূল কাৰণ। যদি সময়ত খাদ্য, ব্যায়াম আৰু স্বাস্থ্যসন্মত অভ্যাস গ্ৰহণ কৰা হয়, তেন্তে কলেষ্টেৰ’ল নিয়ন্ত্ৰণ কৰি হৃদযন্ত্ৰৰ স্বাস্থ্য দীৰ্ঘদিনলৈ সুৰক্ষিত কৰিব পৰা যায়।
