ধুবুৰী জিলাৰ বিলাসীপাৰা, গোৱালপাৰাৰ পাইকান আৰু উৰিয়ামঘাটৰ পিছত এইবাৰ বিশ্বনাথত বেদখলকাৰীৰ বিৰুদ্ধে চলিব প্ৰশাসনৰ বুলড’জাৰ। ইতিমধ্যে চৰকাৰী ভূমিত অবৈধভাৱে বাস কৰি থকা ননকে জাপৰিগুৰিৰ ৩০৭ টা সংখ্যালঘু পৰিয়াললৈ জিলা প্ৰশাসনে উচ্ছেদৰ জাননী প্ৰদান কৰিছে।
এই পৰিয়াল কেইটাই চৰকাৰী গো-চৰনীয়া পথাৰৰ মাটি বেদখল কৰি আছে বুলি অভিযোগ উত্থাপন হৈছে। প্ৰশাসনৰ জাননী অনুসৰি এই পৰিয়াল কেইটাক অহা ১৫ দিনৰ ভিতৰত চৰকাৰী ভূমি খালী কৰিবলৈ নিৰ্দেশ প্ৰদান কৰা হৈছে। চৰকাৰী জাননী অনুসৰি অঞ্চলটোত অবৈধভাৱে নিৰ্মাণ কৰা এটা মছজিদ এটা আৰু এখন কৱৰস্থানত উচ্ছেদ চলিব।
ইফালে জাননী লাভ কৰাৰ পিছতে একাংশ লোকে দাবী কৰা অনুসৰি গৰাখহনীয়াত নিজৰ মাটি-ভেটি হেৰুওৱাৰ বাবেহে চৰকাৰী ভূমিত ঘৰ-দুৱাৰ বনাই আশ্ৰয় গ্ৰহণ কৰি আছিল।
ইয়াৰ উপৰি জাননী লাভ কৰা লোকে চৰকাৰক পুনৰ সংস্থাপনৰ বাবেও দাবী জনাইছে।
জাননী সন্দৰ্ভত এজন বিভাগীয় লোকে কয় যে আজিৰ ভিতৰত আমি জাননী প্ৰদান প্ৰক্ৰিয়া সম্পূৰ্ণ কৰিম। ১৫ দিনৰ ভিতৰত যদি তেওঁলোকে ভূমি খালী নকৰে তেন্তে আমি আইনী ব্যৱস্থা গ্ৰহণ কৰিম।
