ইউক্ৰেইনৰ সৈতে তিনি বছৰৰো অধিক সময় ধৰি চলি থকা যুদ্ধৰ অন্ত বিচৰা নাই ৰাছিয়াই। ভ্লাডিমিৰ পুটিন নেতৃত্বাধীন ৰাছিয়াই যুদ্ধবিৰতিৰ প্ৰস্তাৱ মানিবলৈ অস্বীকাৰ কৰিছে। ৰাছিয়াৰ ৰাষ্ট্ৰপতি পুটিন আৰু আমেৰিকাৰ ৰাষ্ট্ৰপতি ড’নাল্ড ট্ৰাম্পৰ মাজত হোৱা আলোচনাৰ এদিন পিছতেই এই মন্তব্য কৰিছে যুদ্ধবিধ্বস্ত ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিয়ে।
পুটিনৰ এই স্থিতিৰ বাবে তিনি বছৰৰো অধিক সময় ধৰি মস্কোৰ পৰা চলি থকা সংঘৰ্ষৰ অন্ত পেলোৱাৰ যি চেষ্টা সেয়া অধিক কঠিন হৈ পৰিছে বুলিও জেলেনস্কিয়ে মন্তব্য কৰে।
শনিবাৰে গভীৰ নিশা জেলেনস্কিয়ে ছ’চিয়েল মিডিয়াৰ জৰিয়তে কয়, ‘আমি দেখিবলৈ পাইছো যে ৰাছিয়াই যুদ্ধবিৰতিৰ একাধিক আহ্বান নাকচ কৰিছে আৰু এতিয়াও গম পোৱা নাই যে কেতিয়া হত্যা বন্ধ কৰিব। ইয়াৰ ফলত পৰিস্থিতি আৰু অধিক জটিল হৈ পৰিছে।’
তেওঁ লগতে লিখে, ‘যদি আক্ৰমণ ৰোধৰ বাবে সাধাৰণ আদেশ বলবৎ কৰাত অসুবিধা হয়, তেন্তে ৰাছিয়াই হয়তো দশক দশক ধৰি চুবুৰীয়া দেশৰ সৈতে শান্তিপূৰ্ণ সহাৱস্থান বলবৎ কৰাৰ ইচ্ছাশক্তি গঢ়ি তুলিবলৈ অধিক কঠোৰ পৰিশ্ৰম কৰিব লাগিব।’
উল্লেখ্য যে, যুদ্ধৰ অৱসান ঘটোৱাৰ উদ্দেশ্যে শনিবাৰে আলাস্কাত মিলিত হৈছিল আমেৰিকাৰ ৰাষ্ট্ৰপতি ড’নাল্ড ট্ৰাম্প আৰু ৰাছিয়াৰ ৰাষ্ট্ৰপতি ভ্লাডিমিৰ পুটিন। এই বৈঠকত কিবা সমাধান সূত্ৰ ওলাব বুলি বিশ্ববাসীয়ে আশা কৰিছিল যদিও কাৰ্যতঃ সেয়া হৈ নুঠিল।
