মহাৰাষ্ট্ৰৰ ভাছাই-বিৰাৰত ২৬ আগষ্টৰ গভীৰ নিশা সংঘটিত হয় এক বৃহৎ দুৰ্ঘটনা। বিজয় নগৰ বিৰাৰ ইষ্টৰ গণপতি মন্দিৰৰ সমীপত ভাঙি পৰে এটা ৪ মহলীয়া অট্টালিকা। গভীৰ নিশা প্ৰায় ১.০০ বজাত ভাঙি পৰা এই অট্টালিকাটোৰ তলত ১৫ৰ পৰা ২০জন লোক আৱদ্ধ হৈ থকাৰ আশংকা কৰা হৈছে। এই সংখ্যা আৰু অধিক হ’ব পাৰে।
স্বামী সমাৰ্থ নগৰৰ ৰামবাই এপাৰ্টমেণ্ট নামৰ ৪ মহলীয়া অট্টালিকাৰ চতুৰ্থ মহলাৰ এটা অংশ ভাঙি পৰিছে। এই পৰ্যন্ত অৱশ্যে কোনো লোক হতাহতিৰ খবৰ পোৱা নাই। অৱশ্যে এই পৰ্যন্ত আৰক্ষীয়ে ৯ জন লোকক উদ্ধাৰ কৰি চিকিৎসালয়লৈ লৈ গৈছে।
ঘটনাস্থলীত উপস্থিত হৈছে এনডিআৰৰ এটা দল আৰু বৰ্তমানে তালাচী অভিযান চলি আছে। আশংকা কৰা হৈছে যে এতিয়াও ১৫ৰ পৰা ২০জন নাগৰিক অট্টালিকাৰ ধ্বংসাৱশেষত আৱদ্ধ হৈ আছে।
এই অট্টালিকাটো ১০ বছৰ পূৰ্বে নিৰ্মাণ কৰা হৈছিল আৰু পৌৰ নিগমে ইয়াক অতি বিপজ্জনক অট্টালিকা বুলি ঘোষণা কৰিছিল। এতিয়া ভাঙি পেলোৱা হৈছে এই ৰামবাই এপাৰ্টমেণ্ট।
বিধায়ক স্নেহা পণ্ডিত ডুবেয়ে জনাইছে যে, এই দুৰ্ঘটনা সংঘটিত হৈছে ১০-১৫ বছৰীয়া এটা অট্টালিকা ভাঙি পৰাৰ বাবে। এই পৰ্যন্ত ৯ জন লোকক উদ্ধাৰ কৰা হৈছে আৰু প্ৰায় ২০ জন লোক আৱদ্ধ হোৱাৰ আশংকা। সমগ্ৰ এন ডি আৰ এফৰ দল, পৌৰ নিগম আৰু আৰক্ষীৰ দলে উদ্ধাৰ অভিযানত নিয়োজিত হৈ আছে।
বিধায়কগৰাকীয়ে লাভ কৰা তথ্য অনুসৰি, দুৰ্ঘটনা সংঘটিত হোৱা স্থানৰ পৰিস্থিতি এনেকুৱা যে কোনো বাহন বা এম্বুলেন্সেও উদ্ধাৰৰ বাবে যাব পৰা নাই। কোনো সাহায্য নোহোৱাকৈ হাতেৰে উদ্ধাৰ অভিযান চলাব লগা হৈছে উদ্ধাৰকাৰী দলটোৱে। সেইবাবেই সময় লৈছে। দলসমূহে নিজৰ ১০০ শতাংশ দিছে। বৰ্তমান এন ডি আৰ এফৰ আন এটা দল আৰু ২০-২৫ জন জোৱান লৈ মাতি অনা হৈছে।
