সাংহাই সহযোগিতা সংস্থাৰ শীৰ্ষ সন্মিলনৰ বাবে শনিবাৰে চীনৰ টিয়ানজিনত উপস্থিত হয় ভাৰতৰ প্ৰধানমন্ত্ৰী নৰেন্দ্ৰ মোদী। ৭ বছৰৰ মূৰত অৰ্থাত ২০১৮ চনৰ পিছত প্ৰথমবাৰৰ বাবে চীন ভ্ৰমণলৈ গৈছে প্ৰধানমন্ত্ৰী মোদী।
চীনৰ ইতিহাসত আটাইতকৈ বৃহৎভাৱে আয়োজন কৰা সাংহাই সহযোগিতা সংস্থা (এছ চি অ’) শীৰ্ষ সন্মিলনখনত ২০খনৰো অধিক দেশে অংশ ল’ব। এই দেশসমূহৰ ভিতৰত ভাৰতৰ প্ৰধানমন্ত্ৰী নৰেন্দ্ৰ মোদী, ৰাছিয়াৰ ৰাষ্ট্ৰপতি ভ্লাডিমিৰ পুটিনসহ মধ্য প্ৰাচ্য, চেণ্ট্ৰেল এছিয়া, ছাউথ-ইষ্ট এছিয়া আৰু ছাউথ এছিয়াৰ শীৰ্ষ নেতাসকল উপস্থিত থাকিব।
টিয়ানজিন চহৰত অনুষ্টিত হ’বলগীয়া এই সন্মিলনখনৰ পিছত প্ৰধানমন্ত্ৰী মোদী আৰু চীনৰ ৰাষ্ট্ৰপতি জিনপিঙৰ মাজ হ’ব দ্বিপাক্ষিক আলোচনা। ইয়াৰ উপৰি ১ ছেপ্তেম্বৰত পুটিনৰ সৈতেও বৈঠকত মিলিত হ’ব মোদী।
ৰাছিয়া-ইউক্ৰেইন যুদ্ধ, ইজৰাইল-হামাছ সংঘৰ্ষৰ পৰা আৰম্ভ কৰি আমেৰিকাই বিভিন্ন দেশৰ ওপৰত আৰোপ কৰা শুল্কযুদ্ধক লৈ চলি থকা চৰ্চা আৰু বিতৰ্কৰ মাজতেই আজিৰ পৰা অনুষ্ঠিত হ’বলগীয়া সাংহাই সহযোগিতা সংস্থাৰ শীৰ্ষ সন্মিলনখনৰ ওপৰত আমেৰিকাৰ তীক্ষ্ণ দৃষ্টি নিৱদ্ধ আছে।
