এসময়ত চীনক বিশ্বৰ আটাইতকৈ জনবহুল দেশ হিচাপে নামাকৰণ কৰা হৈছিল। কিন্তু বৰ্তমান সময়ত দ্ৰুতগতিত হ্ৰাসৰ দিশে গৈছে চীনৰ জনসংখ্যা।
ৰাষ্ট্ৰসংঘৰ শেহতীয়া প্ৰতিবেদনত কোৱা হৈছে যে, ২১০০ চনৰ ভিতৰত ১৯৫০ৰ দশকৰ সমান হ’ব পাৰে চীনৰ জনসংখ্যা।
জুলাই মাহৰ আৰম্ভণিতে প্ৰকাশিত এক প্ৰতিবেদনত ৰাষ্ট্ৰসংঘই চীনক এক ডাঙৰ সংকটৰ বিষয়ে সতৰ্ক কৰি দিছে। ইয়াত কোৱা হৈছে যে, ২০২৪ ৰ পৰা ২০৫৪ চনৰ ভিতৰত চীনৰ জনসংখ্যা আৰু অধিক হ্ৰাস হোৱাৰ সম্ভাৱনা আছে।
চীনে বৰ্তমান জনসংখ্যা হ্ৰাসৰ সৈতে যুঁজি আছে আৰু দীৰ্ঘদিন ধৰি এই সমস্যাৰ পৰা বাহিৰ হ’বলৈ চেষ্টা কৰি আছে। কিন্তু কোনো লাভালাভ দৃষ্টিগোচৰ হোৱা নাই।
চীনা চৰকাৰে সন্তান ধাৰণ আৰু তেওঁলোকৰ প্ৰতিপালনৰ বাবে ইতিমধ্যে বহুতো আঁচনি ৰূপায়ন কৰিছে। কিন্তু ইয়াৰ পাছতো বৃদ্ধি হোৱা নাই চীনৰ জনসংখ্যা।
খবৰ অনুসৰি, চীনৰ জনসংখ্যা বৰ্তমান হ্ৰাস পাইছে ১.৪০৯৭ বিলিয়নলৈ।বিগত দুটা বছৰ ধৰি হ্ৰাস হৈ আহিছে চীনৰ জনসংখ্যা। ১৯৪৯ চনৰ লোকপিয়ল প্ৰতিবেদনৰ ওপৰত ভিত্তি কৰি ২০২৩ চনত চীনৰ জন্মৰ হাৰ সৰ্বনিম্ন সংখ্যাত নথিভুক্ত কৰা হৈছে।
চীনৰ এই জনসংখ্যা হ্ৰাসৰ প্ৰধান কাৰণ হৈছে পলমকৈ বিবাহত বহা।যাৰবাবে বয়স বৃদ্ধি হোৱাৰ বাবে মহিলাসকলৰ প্ৰজনন ক্ষমতা হ্ৰাস হয়।
ইয়াৰ উপৰি বৰ্তমান বহুতো যুৱক-যুৱতী নিজৰ চেহেৰা সম্পৰ্কে সজাগ। যাক ভালে ৰাখিবলৈ তেওঁলোকে সম্তানৰ পিতৃ-মাতৃ হ’ব নিবিচাৰে।
আকৌ বহুতো মহিলাই নিজৰ কেৰিয়াৰৰ ক্ষেত্ৰত হেঙাৰ হ’ব বুলি শিশুৰ দ্বায়িত্বৰ পৰা আঁতৰি থাকে।যাৰবাবে দ্ৰুতগতিত হ্ৰাস পাইছে চীনৰ জনসংখ্যা।
