ৱেষ্ট ইণ্ডিজৰ বিৰুদ্ধে টেষ্ট শৃংখলাৰ তৃতীয়খন মেচত ইংলেণ্ডৰ প্ৰাক্তন অধিনায়ক জ’ ৰুটে কেইবাটাও অভিলেখ গঢ়িবলৈ সক্ষম হয়। ইংলেণ্ডৰ প্ৰথম ইনিংছত ৰুটে খেলা ১২৪টা বলত ৮৭ ৰানৰ ইনিংছৰ জৰিয়তে মহান ক্ৰিকেটাৰ ব্ৰায়ান লাৰাৰ অভিলেখ ভংগ কৰিবলৈ সক্ষম হয়।
টেষ্ট ক্ৰিকেটত সৰ্বাধিক ৰান সংগ্ৰহকাৰীৰ ক্ষেত্ৰত ব্ৰায়ান লাৰাক অতিক্ৰম কৰে ৰুটে। টেষ্ট কেৰিয়াৰত লাৰাই সংগ্ৰহ কৰিছিল ১১৯৫৩ ৰান। ইফালে ৰুটে এইপৰ্যন্ত টেষ্টত সংগ্ৰহ কৰিছে ১২০২৭ ৰান।
কেৱল এয়াই নহয় টেষ্ট ক্ৰিকেটত দ্ৰুত ১২ হাজাৰ ৰান সংগ্ৰহ কৰাৰ ক্ষেত্ৰতো ৰুটে অতিক্ৰম কৰে নিজ দেশৰে প্ৰাক্তন অধিনায়ক এলিষ্টেয়াৰ কুকক। ৰুটে ২৬১টা ইনিংছত ১২ হাজাৰ ৰান সংগ্ৰহ কৰিবলৈ সক্ষম হয়। আনহাতে ১২ হাজাৰ সংগ্ৰহ কৰাৰ বাবে কুকক প্ৰয়োজন হৈছিল ২৭৫টা ইনিংছৰ।
ইয়াৰ উপৰি টেষ্ট ক্ৰিকেটত ১২ হাজাৰ ৰান সংগ্ৰহ কৰা সপ্তমগৰাকী ক্ৰিকেটাৰত পৰিণত হ’ল ৰুট। ৰুটে ১২ হাজাৰ ৰান সংগ্ৰহ কৰাৰ ক্ষেত্ৰত শচীন তেণ্ডুলকাৰৰো অভিলেখ ভংগ কৰে। ৰুটে ১৪৩ খন মেচত ১২ হাজাৰ ৰান সংগ্ৰহ কৰাৰ বিপৰীতে শচীনে ১৫২ খন মেচত সংগ্ৰহ কৰিছিল ১২ হাজাৰ ৰান।
কেৱল এয়াই নহয়, টেষ্ট ক্ৰিকেটত সৰ্বাধিক দ্ৰুত গতিত ১২ হাজাৰ ৰান সংগ্ৰহ কৰা দ্বিতীয়গৰাকী বেটছমেনৰূপে পৰিগণিত হ’ল ৰুট। এই ক্ষেত্ৰত প্ৰথম স্থানত আছে শ্ৰীলংকাৰ প্ৰাক্তন মহান ক্ৰিকেটাৰ কুমাৰ ছাংগাকাৰা। ছাংগাকাৰাই ১৩০ খন মেচত ১২ হাজাৰ ৰান সংগ্ৰহ কৰিছিল।
ৰুট, কুকৰ পিছত ১২ হাজাৰ ৰান সংগ্ৰহ কৰা দ্বিতীয়গৰাকী ইংলেণ্ডৰ বেটছমেন। টেষ্ট কেৰিয়াৰত কুকে সৰ্বমুঠ ১২,৪৭২ ৰান সংগ্ৰহ কৰিছিল।
টেষ্টত সৰ্বাধিক ৰান সংগ্ৰহকাৰীৰ ক্ষেত্ৰত ৰুট কেৱল শচীন (১৫৯২১), ৰিকি পন্টিং(১৩৩৭৮), জেকছ কালিছ (১৩২৮৯), ৰাহুল দ্ৰাবিড় (১৩২৮৮), কুক (১২৪৭২) আৰু কুমাৰ ছাংগাকাৰা (১২৪০০) ৰ পিছত আছে।
