বৃহস্পতিবাৰে ইজৰাইল আৰু হামাছে যুদ্ধবিৰতি আৰু পেলেষ্টাইনী বন্দীসকলৰ বিনিময়ত ইজৰাইলী পণবন্দীসকলক মুকলি কৰি দিয়াৰ চুক্তিত স্বাক্ষৰ কৰে। এই চুক্তিখন আমেৰিকাৰ ৰাষ্ট্ৰপতি ড’নাল্ড ট্ৰাম্পে গাজাৰ যুদ্ধৰ অন্ত পেলোৱাৰ প্ৰথম পৰ্যায়ৰ পদক্ষেপৰ অংশ।
ইজিপ্তত দুয়োপক্ষৰ শীৰ্ষ বিষয়াৰ মাজত হোৱা আলোচনাৰ অন্তত এই চুক্তি স্বাক্ষৰ কৰাটো নিশ্চিত কৰা হৈছে। এই চুক্তিৰ ঘোষণাৰ লগে লগে পেলেষ্টাইনী আৰু ইজৰাইলীসকলৰ মাজত আনন্দৰ বন্যা বোৱা পৰিলক্ষিত হয়।
দুবছৰীয়া যুদ্ধৰ অন্ত পেলোৱাৰ দিশত এইটোৱেই এতিয়ালৈকে লোৱা আটাইতকৈ ডাঙৰ পদক্ষেপ, য’ত ৬৭ হাজাৰতকৈ অধিক পেলেষ্টাইনী নিহত হৈছে।
এই চুক্তিৰ অধীনত যুদ্ধবিৰতি কাৰ্যকৰী কৰা হ’ব। গাজাৰ পৰা আংশিকভাৱে আঁতৰি আহিব ইজৰাইল। ইজৰাইলৰ প্ৰধানমন্ত্ৰী বেঞ্জামিন নেতান্যাহুৱে কয় যে তেওঁৰ চৰকাৰৰ অনুমোদনৰ পিছত যুদ্ধবিৰতি কাৰ্যকৰী হ’ব।
ৰয়টাৰৰ এক প্ৰতিবেদন অনুসৰি ইজৰাইল চৰকাৰে এই চুক্তি স্বাক্ষৰ কৰাটো নিশ্চিত কৰি কয় যে কেবিনেট বৈঠকৰ ২৪ ঘণ্টাৰ ভিতৰত যুদ্ধবিৰতি কাৰ্যকৰী হ’ব। গাজাত পণবন্দী কৰি ৰখা লোকসকলক ৭২ ঘণ্টাৰ ভিতৰত মুকলি কৰি দিয়া হ’ব।
