অপেক্ষাৰ অন্ত পেলাই ছবিগৃহত মুক্তি পালে প্ৰাণৰ শিল্পী সপোনৰ তথা শেষৰখন ছবি ৰৈ ৰৈ বিনালে। উজাগৰী নিশা কটাই পুৱতি নিশা ৩ বজাতে ছবিগৃহলৈ আহিছে অসংখ্য লোক। শেষবাৰৰ বাবে প্ৰিয় শিল্পী গৰাকীৰ হেঁপাহৰ ছবিখন চাবলৈ হিলদ’ল ভাঙি ওলাই আহিছে অসমবাসী।
মহানগৰীৰ বেলতলাৰ মেট্ৰিক্স চিনেমা হলত পুৱতি নিশা ৪ বাজি ২৫ মিনিটৰ লগে লগে আৰম্ভ হয় চিনেমাখনৰ প্ৰথম দৰ্শনী।চিনেমা উপভোগ কৰি কান্দি কান্দি ওলাই আহে প্ৰতিগৰাকী দৰ্শক।
এবুকু বেদনা লৈ ছবিগৃহলৈ অহা প্ৰতিগৰাকী লোকৰে মুখত মাত্ৰ এটাই কথা। ‘আমাক ন্যায় লাগে…জুবিন দাক শীঘ্ৰে ন্যায় দিয়ক’। ১৫ বছৰীয়া পৰিকল্পনাৰ অন্তত বহু হেঁপাহেৰে হাৰ্টথ্ৰৱ জুবিন গৰাকীয়ে সংগীতক লৈ নিৰ্মাণ কৰা সপোনৰ ছবিখন চাই আবেগিক হৈ ওলাই আহে প্ৰতিগৰাকী দৰ্শক। ছবিখনৰ প্ৰতিটো দৃশ্যৰ লগে লগে ছবিগৃহত প্ৰতিধ্বনিত হৈছে প্ৰতিগৰাকী অসমীয়াৰ উচুপনি।
