সৰভোগত অসম আৰক্ষীৰ কনিষ্টবলৰ বিৰুদ্ধে পত্নীয়ে উত্থাপন কৰিছে এক ভয়ংকৰ অভিযোগ। পত্নী ঘৰত নথকাৰ সুযোগ লৈ অন্য মহিলা ঘৰলৈ আনি অনৈতিক কাৰ্যত লিপ্ত হোৱাৰ অভিযোগ উঠিছে দিগন্ত ৰায় নামৰ আৰক্ষীৰ কনিষ্টবলজনৰ বিৰুদ্ধে।
সৰভোগ আৰক্ষী থানাৰ অন্তৰ্গত দুৰামাৰী গাঁৱৰ গৃহৰক্ষী বাহিনীত কৰ্মৰত এগৰাকী মহিলাই নিজ স্বামীৰ বিৰুদ্ধে অভিযোগ উত্থাপন কৰিছে। মহিলাগৰাকীৰ অভিযোগ অনুসৰি, তেওঁৰ স্বামী তথা বৰ্তমান আলোপতি চৰ আৰক্ষী থানাত অসম আৰক্ষীৰ কনিষ্টবল হিচাপে কৰ্মৰত গোলাঘাটৰ ডেৰগাঁৱৰ দিগন্ত ৰায়ে দুগৰাকী পত্নী থকাৰ পাছতো চল-চাতুৰিৰে এই মহিলাগৰাকীৰ সৈতে বিবাহপাশত আৱদ্ধ হৈছিল।
বিয়াৰ পাছত স্বামীৰ প্ৰকৃত কথা গম পোৱাৰ পাছতো সকলো কথা মানি চলিছিল এইগৰাকী মহিলাই। মহিলাগৰাকীয়ে সৰভোগৰ দুৰামাৰী গাঁৱত থকা নিজৰ গৃহতেই আশ্ৰয় দিছিল কনিষ্টবল স্বামী দিগন্ত ৰায়ক। কিন্তু, তাৰ পাছতো বহুতো নাৰীৰ লগত অবৈধ সম্পৰ্ক ৰক্ষা কৰি চলি আহিছিল কনিষ্টবল দিগন্ত ৰায়ে।
মহিলাগৰাকীৰ অভিযোগ অনুসৰি, শুকুৰবাৰে দিনৰ ভাগত তেওঁ চাকৰিৰ সংক্ৰান্তত বৰপেটালৈ যোৱাৰ সময়তে স্বামী দিগন্ত ৰায়ে আমগুৰি ডেকাৰবড়ীৰ বেগম উপাধিৰ এগৰাকী মহিলাক পত্নীৰ সৰভোগ দুৰামাৰীস্থিত ঘৰলৈ আনি অবৈধ সম্পৰ্কত লিপ্ত হয়। গৃহৰক্ষী বাহিনীত কৰ্মৰত মহিলাগৰাকীয়ে এই সংক্ৰান্তত সৰভোগ আৰক্ষী থানাত এখন এজাহাৰ দাখিল কৰাৰ লগতে সংবাদ মাধ্যমৰ আগত আৰক্ষী তথা প্ৰশাসনে কনিষ্টবল দিগন্ত ৰায়ৰ ওপৰত উপযুক্ত ব্যৱস্থা ল’বলৈ অনুৰোধ জনায়।
