১৫ ডিচেম্বৰত হোৱাইট হাউছৰ অভাল অফিচত সাংবাদিকৰ সৈতে হোৱা এক সাক্ষাৎকাৰত আমেৰিকাৰ ৰাষ্ট্ৰপতি ড’নাল্ড ট্ৰাম্পে কয় যে, তেওঁ দৃঢ় বিশ্বাসী যে তেওঁ যুদ্ধ বন্ধ কৰাৰ দিশে আগবাঢ়িছে। ইউক্ৰেইনৰ ৰাষ্ট্ৰপতি ভ’ল’ডিমাইৰ জেলেনস্কি আৰু ইউৰোপৰ কেইবাজনো নেতাৰ সৈতে সাক্ষাতৰ পিছতেই তেওঁ এই মন্তব্য কৰে।
ইউক্ৰেইনৰ ৰাষ্ট্ৰপতি জেলেনস্কিয়ে ট্ৰাম্পৰ বিশেষ দূত ষ্টিভ উইটকফ আৰু ৰাষ্ট্ৰপতিৰ জোঁৱাই জেৰেড কুছনাৰৰ সৈতে একেৰাহে দ্বিতীয় দিন বাৰ্তালাপ কৰে। যুদ্ধৰ অন্ত পেলোৱাৰ বাবে ট্ৰাম্পৰ প্ৰাৰম্ভিক প্ৰস্তাৱৰ ভিত্তিত এই আলোচনাসমূহ হৈছিল। ইউৰোপীয় নেতাসকলে শান্তি চুক্তি বলবৎ কৰিবলৈ বহুজাতিক বাহিনী নিয়োগ কৰাৰ প্ৰস্তাৱ আগবঢ়াইছে।
এই ব্যৱস্থাই যুদ্ধবিৰতি উলংঘাৰ ওপৰত নিৰীক্ষণ কৰিব আৰু ভৱিষ্যতে আক্ৰমণৰ সতৰ্কবাণী দিব। জেলেনস্কিয়ে আমেৰিকাৰ নতুন নিৰাপত্তা নিশ্চয়তাৰ প্ৰশংসা কৰে যদিও ভূখণ্ড এৰি দিয়াৰ বিষয়টোক লৈ মতানৈক্য অব্যাহত আছে বুলি উল্লেখ কৰে।
ট্ৰাম্পৰ মতে ইউক্ৰেইনে কিছু ভূখণ্ড ৰাছিয়াক অৰ্পণ কৰিব লাগিব যদিও জেলেনস্কিয়ে এই কথা মানি ল’বলৈ অনিচ্ছুক।আমেৰিকাৰ এজন বিষয়াই কয় যে ৰাছিয়াৰ ৰাষ্ট্ৰপতি ভ্লাদিমিৰ পুটিনে ইউক্ৰেইনৰ এই ভূখণ্ডসমূহ নিজৰ অন্তৰ্ভুক্ত কৰিব বিচাৰে।
ইতিমধ্যে ট্ৰাম্পে উল্লেখ কৰিছে যে ইউক্ৰেইনে নাটোত যোগদান নকৰে। তেওঁ কিয়ভৰ নাটোৰ উচ্চাকাংক্ষাক ৰাছিয়াৰ আক্ৰমণৰ কাৰণ বুলি উল্লেখ কৰে। জাৰ্মানীৰ চ্যান্সেলৰ ফ্ৰেড্ৰিখ মেৰ্জে ট্ৰাম্পৰ শেহতীয়া আলোচনাক “প্ৰকৃত শান্তি প্ৰক্ৰিয়াৰ সম্ভাৱনা” বুলি অভিহিত কৰি আমেৰিকাৰ নিৰাপত্তাৰ নিশ্চয়তাক অতি গুৰুত্বপূৰ্ণ বুলি অভিহিত কৰে।
