পেহেলগামত সংঘটিত সন্ত্ৰাসবাদী আক্ৰমণৰ পিছত ভাৰতে পাকিস্তানলৈ সিন্ধু নদীৰ পানী যোগান বন্ধ কৰি ৰাখিছে, যাৰ ফলত বহু অঞ্চলত খৰাং সদৃশ পৰিস্থিতিৰ সৃষ্টি হৈছে। ইফালে আফগানিস্তানৰ তালিবান চৰকাৰে এক বৃহৎ সিদ্ধান্ত গ্ৰহণ কৰিছে। এই সিদ্ধান্তই পাকিস্তানৰ জল সংকট আৰু অধিক ভয়াৱহ কৰি তুলিব পাৰে।
তালিবানে কুনাৰ নদীৰ পানী নাংগাৰহাৰ অঞ্চললৈ ডাইভাৰ্ট কৰাৰ পৰিকল্পনা আগবঢ়াই নিয়াৰ সিদ্ধান্ত লৈছে। এই পদক্ষেপে পাকিস্তানৰ খাইবাৰ পখতুনখোৱা প্ৰদেশত নদীখনৰ সোঁত বহু পৰিমাণে হ্ৰাস কৰিব পাৰে। শেহতীয়াকৈ পাকিস্তান-আফগানিস্তান সীমান্তত উত্তেজনা জ্বলি উঠিছে, যাৰ ফলত দুয়োখন দেশৰ কেইবাজনো জোৱানৰ মৃত্যু হৈছে।
আফগানিস্তানত প্ৰকাশিত এক বাতৰি অনুসৰি, কুনাৰ নদীৰ পানীক নংগাৰহৰৰ দাৰুন্তা বান্ধলৈ ডাইভাৰ্ট কৰাৰ প্ৰস্তাৱক লৈ প্ৰধানমন্ত্ৰী কাৰ্যালয়ৰ অৰ্থনৈতিক আয়োগৰ কাৰিকৰী সমিতিৰ বৈঠকত অৰ্থনৈতিক আয়োগে আলোচনা কৰি অনুমোদন জনায়। এই প্ৰকল্পটো কাৰ্যকৰী হোৱাৰ পিছত আফগানিস্তানৰ নাংগাৰহৰৰ বহু কৃষিভূমিত প্ৰভাৱ পেলোৱা পানীৰ নাটনি দূৰ কৰিব বুলি আশা কৰা হৈছে যদিও ইয়াৰ ফলত পাকিস্তানৰ খাইবাৰ পখতুনখোৱালৈ পানীৰ প্ৰবাহত প্ৰভাৱ পৰিব।
প্ৰায় ৫০০ কিলোমিটাৰ দৈৰ্ঘ্যৰ কুনাৰ নদীৰ উৎপত্তি হৈছে পাকিস্তানৰ খাইবাৰ পখতুনখোৱা প্ৰদেশৰ চিত্ৰাল জিলাৰ হিন্দু কুছ পৰ্বতমালাৰ পৰা। ইয়াৰ পিছত ই দক্ষিণলৈ বৈ আফগানিস্তানলৈ গৈ কুনাৰ আৰু নাংগাৰহৰ প্ৰদেশৰ মাজেৰে পাৰ হৈ কাবুল নদীৰ লগত মিলি যায়। এই নদীখন পাকিস্তানৰ অন্যতম বৃহৎ নদী আৰু সিন্ধু নদীৰ দৰেই ই জলসিঞ্চন, খোৱাপানী, জলবিদ্যুৎ উৎপাদনৰ প্ৰধান উৎস, বিশেষকৈ সীমা অতিক্ৰম কৰি হিংসাৰ কেন্দ্ৰবিন্দু হৈ পৰা দুৰ্গম খাইবাৰ পাখতুনখোৱা অঞ্চলৰ বাবে।
যদি আফগানিস্তানে কুনাৰ নদীত বান্ধ নিৰ্মাণ কৰে, তেন্তে ইয়াৰ ফলত পাকিস্তানৰ জলসিঞ্চন, খোৱাপানী যোগান, জলবিদ্যুৎ প্ৰকল্পৰ বাবে পানী পোৱাত যথেষ্ট প্ৰভাৱ পৰাৰ সম্ভাৱনা আছে, বিশেষকৈ ভাৰতে সিন্ধু নদীৰ পানী যোগানৰ ক্ষেত্ৰত নিষেধাজ্ঞা আৰোপ কৰাৰ বাবে ইতিমধ্যে খৰাং পৰিস্থিতিত ভুগি থকাসকলৰ বাবে।
তাতোকৈ ডাঙৰ কথাটো হ’ল দিল্লীৰ সৈতে হোৱা সিন্ধু জল সন্ধি (IWT)ৰ বিপৰীতে ইছলামবাদৰ কাবুলৰ সৈতে এই জলভাগসমূহৰ ভাগ-বতৰা সন্দৰ্ভত কোনো চুক্তি নাই, অৰ্থাৎ তালিবানক প্ৰত্যাহাৰ কৰিবলৈ বাধ্য কৰাৰ কোনো তাৎক্ষণিক উপায় নাই। তালিবানৰ এই পদক্ষেপে পাকিস্তান-আফগানিস্তানৰ হিংসাৰ পুনৰ উত্থানৰ সম্ভাৱনা বৃদ্ধি কৰিছে।
