কৰ্তব্যৰত আৰক্ষীৰ ওপৰত আক্ৰমণ। এগৰাকী মহিলাৰ বিৰুদ্ধে ৰুজু কৰা হৈছে গোচৰ। ১ ফেব্ৰুৱাৰীৰ নিশা পুস্তা ৰোডত সংঘটিত হয় এই ঘটনা।
জানিব পৰা মতে, পূৱ দিল্লীৰ গীতা কলনী অঞ্চলত হেড কনিষ্টবল অংকুৰ আৰু কনিষ্টবল জাভেদে জৰুৰীকালীন কৰ্তব্যৰত অৱস্থাত পুষ্টা ৰোডত কাজিয়াৰ সম্ভেদ পায়। এই তথ্যৰ ভিত্তিত কাম কৰি বিষয়া দুজনে পুষ্টা ৰোডত উপস্থিত হয়, য’ত ইতিমধ্যে বিশৃংখলতাৰ সৃষ্টি হৈছিল। ঘটনাস্থলীত উপস্থিত থকাসকলৰ মাজত এক হুলস্থুলীয়া পৰিৱেশৰ সৃষ্টি হয় আৰু আৰক্ষীয়ে এই পৰিৱেশ শান্ত কৰাৰ চেষ্টা কৰে।
আৰক্ষী বিষয়াসকলে জনোৱা মতে, শৃংখলা ঘূৰাই অনাৰ সময়তে এগৰাকী মহিলা আৰু আন লোকে আৰক্ষীকো অপদস্থ কৰে। অভিযোগ অনুসৰি, মহিলাগৰাকীয়ে হেড কনিষ্টবল অংকুৰক ধৰি ইউনিফৰ্ম ফালি সোঁ কান্ধত কামোৰি দিয়ে। এই সময়ছোৱাত আন এজন আৰক্ষী বিষয়াকো আক্ৰমণৰ কৰাৰ ফলত পৰিস্থিতি আৰু অধিক ভয়াৱহ হৈ পৰে।
ঘটনাৰ সময়ত ঘটনাস্থলীত একাংশ লোক সমবেত হয় আৰু একাংশ লোকে মোবাইল ফোনেৰে এই দৃশ্য ৰেক’ৰ্ড কৰে।খবৰ অনুসৰি, আৰক্ষীয়ে শান্তি বজাই ৰাখিবলৈ বাৰে বাৰে চেষ্টা কৰাৰ পাছতো হুলস্থুলীয়া পৰিৱেশ অব্যাহত থকাৰ লগতে চৰকাৰী কাম-কাজত বাধাৰ সৃষ্টি হয়। পিছত আহত আৰক্ষী ২ জনক চিকিৎসা পৰীক্ষাৰ বাবে ডাঃ হেডগেৱাৰ হাস্পতাললৈ লৈ যোৱা হয়। ইতিমধ্যে আৰক্ষীয়ে মহিলাগৰাকীৰ বিৰুদ্ধে ভাৰতীয় দণ্ডবিধিৰ সংশ্লিষ্ট ধাৰাত গোচৰ ৰুজু কৰি তদন্ত আৰম্ভ কৰিছে।
