আজি পুনৰ ছিংগাপুৰৰ ষ্টেট কৰ’নাৰ্চ আদালতত চলিব জুবিন গাৰ্গৰ মৃত্যুৰ গোচৰৰ শুনানি। ইয়াৰ পূৰ্বে পোহৰলৈ আহিছে এক ডাঙৰ খবৰ। যোৱা ৩ ফেব্ৰুৱাৰীৰ শুনানিত ঘটনাৰ প্ৰত্যক্ষদৰ্শীৰ সাক্ষ্য গ্ৰহণ কৰে আদালতে।
এই শুনানিত প্ৰত্যক্ষদৰ্শীয়ে উল্লেখ কৰে যে, য়’টত উঠাৰ আগলৈকে কেপ্লেল বে’ৰ মেৰিনাত উপস্থিত হোৱাৰ সময়ত জুবিন গাৰ্গৰ মুখত সুৰাৰ কোনো গোন্ধ নাছিল। য়টত উঠিহে জুবিনে সুৰাপান কৰা বুলি সাক্ষ্যদান কৰে প্ৰৱাসী অসমীয়াই।
৩ ফেব্ৰুৱাৰীৰ এই শুনানিত উপস্থিত আছিল জুবিন গাৰ্গৰ খুড়াক মনোজ বৰঠাকুৰ। লগতে উপস্থিত আছিল জুবিন গাৰ্গৰ পুত্ৰসম ৰাহুল গৌতম শৰ্মা।
উল্লেখ্য যে, আজি জুবিন গাৰ্গ আৰু গৰিমা শইকীয়া গাৰ্গৰ ২৪ সংখ্যক বিবাহ বাৰ্ষিকী।২০০২চনৰ আজিৰ দিনটোতে বিবাহ পাশত আৱদ্ধ হৈছিল জুবিন-গৰিমা। আজি স্বামী বিহীন প্ৰথমটো বিবাহ বাৰ্ষিকীত আৱেগিক হৈ পৰিছে গৰিমা শইকীয়া গাৰ্গ। সামাজিক মাধ্যমত গৰিমাই শ্বেয়াৰ কৰিলে পুৰণি ভিডিঅ’ আৰু ফটো।
