গাজা ষ্ট্ৰিপত হামাছৰ বিৰুদ্ধে চলি থকা অভিযানত ইজৰাইল প্ৰতিৰক্ষা বাহিনীয়ে এক উল্লেখযোগ্য অগ্ৰগতি লাভ কৰাৰ দাবী জনাইছে। ইজৰাইলৰ সেনা আৰু আভ্যন্তৰীণ নিৰাপত্তা সংস্থা শ্বিন বেটৰ যৌথ অভিযানত হামাছৰ এটা অপাৰেটিং চেলৰ মুৰব্বী মহম্মদ ইছাম হাছান আল হাবিলক হত্যা কৰে। ইজৰাইলৰ মতে, আইডিএফৰ চোৱাচিতা জোৱান কৰ্পৰেল নোয়া মাৰ্চিয়ানোৰ হত্যাকাণ্ডৰ সৈতে জড়িত সন্ত্ৰাসবাদী আছিল আল-হাবিল।
আইডিএফে কয় যে, হামাছে যুদ্ধবিৰতি উলংঘাৰ পিছত এই পদক্ষেপ লোৱা হৈছে। সেনাবাহিনীৰ মতে, ২০২৩ চনৰ ৭ অক্টোবৰত ইজৰাইলৰ ওপৰত হামাছৰ আক্ৰমণৰ অন্যতম মূল ষড়যন্ত্ৰকাৰী আছিল আল-হাবিল।একে আক্ৰমণৰ সময়তে নোয়া মাৰ্চিয়ানোক নাহাল অজ সামৰিক চেকপইণ্টৰ পৰা অপহৰণ কৰা হৈছিল আৰু পিছত তেওঁৰ মৃত্যু হোৱা বুলি নিশ্চিত কৰা হৈছিল, যাৰ ফলত সমগ্ৰ ইজৰাইলতে ব্যাপক ক্ষোভৰ সৃষ্টি হৈছিল।
ইজৰাইলৰ সেনাই জনোৱা মতে, ৪ ফেব্ৰুৱাৰীত গাজা চহৰৰ শ্বাটি শৰণাৰ্থী শিবিৰত বিমান আক্ৰমণত আল হাবিলৰ মৃত্যু হোৱাৰ লগতে ইছলামিক জেহাদৰ আলী ৰাজিয়ানাও নিহত হয়। ৰাজিয়ানা উত্তৰ গাজা ব্ৰিগেডৰ ইছলামিক জেহাদৰ মুখ্য সেনাপতি আছিল। আইডিএফৰ মতে, আল-হাবিলে ইজৰাইলৰ এজন ৰিজাৰ্ভ বিষয়াৰ ওপৰত গুলীচালনা কৰি গুৰুতৰভাৱে আহত কৰি সেনাবাহিনীৰ দৃষ্টিগোচৰ হয়।
ইজৰাইলৰ সেনাই ছ’চিয়েল মিডিয়াত এই অভিযান নিশ্চিত কৰি কয় যে এই অভিযানে নোয়া মাৰ্চিয়ানোৰ পৰিয়ালক ন্যায় প্ৰদান কৰে। ইয়াৰ উপৰিও সাধাৰণ নাগৰিক আৰু জোৱানৰ বিৰুদ্ধে হিংসা কৰাসকলক কোনো মূল্যৰ বিনিময়ত ৰেহাই দিয়া নহ’ব বুলিও উল্লেখ কৰা হৈছে।
আইডিএফৰ দাবী যে গাজাৰ শ্বিফা হাস্পতালত কাৰাবন্দী হৈ থকাৰ সময়তে নোয়া মাৰ্চিয়ানোৰ হত্যাকাণ্ডত আল-হাবিলে ভূমিকা লৈছিল। নোয়াৰ পৰিয়ালে জনোৱা মতে, এজন চিকিৎসকে তেওঁৰ শিৰাত বায়ু বেজী দি হত্যা কৰাৰ অভিযোগ উত্থাপন হৈছে। ৭ অক্টোবৰৰ আক্ৰমণৰ সময়ত অপহৃত কেইবাগৰাকীও মহিলাৰ ভিতৰত এগৰাকী ১৯ বছৰীয়া আইডিএফৰ পৰ্যবেক্ষক আছিল নোয়া মাৰ্চিয়ানো। বন্দী হোৱা আন মহিলাসকলক পিছত জীৱিত অৱস্থাত ঘূৰাই অনাৰ বিপৰীতে নোয়াক নহয়।
