জনতাৰ প্ৰতিবাদৰ মাজতে সেনা বাহিনীৰ চাপত বাংলাদেশৰ পৰা পলায়ন কৰিবলৈ বাধ্য হ’ল প্ৰধানমন্ত্ৰী হাছিনা শ্বেখে। শেহতীয়া খবৰমতে, দিল্লীৰ পৰা লণ্ডনলৈ যাত্ৰা কৰিছে শ্বেখ হাছিনাই।
ইপিনে বাংলাদেশৰ প্ৰতিবাদকাৰীসকলে ধনমণ্ডি আৰু ঢাকাৰ আৱামী লীগৰ জিলা কাৰ্যালয়ত অগ্নিসংযোগ কৰে। ধনমণ্ডিৰ বঙ্গবন্ধু শ্বেখ মুজিবুৰ ৰহমান স্মাৰক সংগ্ৰহালয়তো লণ্ডভণ্ড কৰে প্ৰতিবাদকাৰীয়ে। আনহাতে একাংশ উত্তেজিত লোকে হিন্দু পৰিয়ালৰ লগতে মন্দিৰত আক্ৰমণ কৰিছে। হিংসাত্মক পৰিৱেশৰ প্ৰতি লক্ষ্য ৰাখি দেশখনত স্তব্ধ কৰি দিয়া হৈছে ৰেলসেৱা।
অশান্ত পৰিস্থিতি নিয়ন্ত্ৰণৰ বাবে তৎপৰ দেশখনৰ সেনাপ্ৰধান ৱাকাৰ উজ জামান। বাংলাদেশ সেনা বাহিনীৰ কাৰ্যালয়ত অনুষ্ঠিত হৈছে বৈঠক। এই বৈঠকত বিভিন্ন ৰাজনৈতিক দলৰ নেতাৰ লগতে দেশৰ বিশিষ্ট নাগৰিককো আমন্ত্ৰণ জনোৱা হয়।
৪৮ ঘণ্টাৰ ভিতৰত বাংলাদেশত অন্তৰ্ৱৰ্তীকালীন চৰকাৰ গঠন কৰাৰ ঘোষণা সেনা প্ৰধানৰ। সংবাদ মাধ্যমক সম্বোধন কৰি আন্দোলনকাৰীসকলক উদ্দেশ্যি সেনা প্ৰধানৰ মন্তব্য, ‘‘আমি সকলো দায়িত্ব লৈছো। শীঘ্ৰে পৰিস্থিতি স্বাভাৱিক হ’ব।’’ আন্দোলনকাৰীসকলক প্ৰতিবাদ, বিক্ষোভ কাৰ্যসূচীৰ পৰা বিৰত থাকিবলৈ আহ্বান জনায় সেনা প্ৰধানগৰাকীয়ে।
সেনা প্ৰধানগৰাকীয়ে লগতে কয় যে, অন্তৱৰ্তীকালীন চৰকাৰৰ জৰিয়তে বাংলাদেশত সকলো কামেই সম্পন্ন হ’ব। এই বিষয়ে দেশখনৰ ৰাষ্ট্ৰপতিৰ সৈতে আলোচনা কৰা হ’ব বুলি উল্লেখ কৰিছে সেনাপ্ৰধান গৰাকীয়ে।
লগতে তেওঁ কয় যে, প্ৰতিটো হত্যাকাণ্ডৰ বিৰুদ্ধে গোচৰ চলোৱা হ’ব। সকলো মানুহৰ মতামত লৈ বাংলাদেশৰ নতুন চৰকাৰ গঠন হ’ব বুলি উল্লেখ কৰে সেনা প্ৰধানগৰাকীয়ে ।
অন্তৰ্ৱৰ্তীকালীন চৰকাৰত কোন কোন থাকিব?
অন্তৰ্ৱৰ্তীকালীন চৰকাৰত অন্তৰ্ভুক্ত কৰা হ’ব ১৮ জন লোকক। অন্তৱৰ্তীকালীন চৰকাৰত থাকিব বেংকিং, সংবাদক্ষেত্ৰ, অভিযন্তা, অধিবক্তাৰ লগতে শিক্ষাখণ্ডৰ সৈতে জড়িত লোক।
