সুপ্ৰভাত। দিনটোৰ আৰম্ভণিতেই কেইটামান গুৰুত্বপূৰ্ণ খবৰেৰে আৰম্ভ কৰিছো ৰাতিপুৱাৰ এই শিতানটো।
শ্যামকানু, সিদ্ধাৰ্থৰ পাছত শেখৰজ্যোতি গোস্বামীৰো জামিন আবেদন দাখিল। ফাষ্টট্ৰেক আদালতত জামিন বিচাৰি আবেদন শেখৰজ্যোতি গোস্বামীৰ। আজি শেখৰজ্যোতি গোস্বামীৰ জামিন আবেদনৰ শুনানি। শুনানি গ্ৰহণ কৰিব ন্যায়াধীশ শৰ্মিলা ভূঞাই। হাফলং উপ-কাৰাগাৰত আছে শেখৰজ্যোতি গোস্বামী।
আজি কেৰালামত নতুন চৰকাৰৰ শপতগ্ৰহণ। মুখ্যমন্ত্ৰী হিচাপে শপত ল’ব ভি ডি সতীশনে। তিৰুৱন্তপুৰমৰ চেন্ট্রেল ষ্টেডিয়ামত হ’ব শপতগ্ৰহণ সমাৰোহ। ৰাহুল গান্ধী, প্ৰিয়ংকা গান্ধী, মল্লিকাৰ্জুন খৰ্গে উপস্থিত থাকিব শপতগ্ৰহণ সমাৰোহত। শপতগ্ৰহণ সমাৰোহৰ সাক্ষী হ’ব কেৰালামৰ এক লক্ষ জনতা। একদশকৰ পাছত কংগ্ৰেছৰ সমৰ্থনত চৰকাৰ গঠন কৰিব UDF-এ।
যাত্ৰীবাহী ৰে’লত ভয়ংকৰ ঘটনা। দপদপকৈ জ্বলি উঠিল এখন যাত্ৰীবাহী ৰে’ল। ষ্টেচনত ৰখাই থোৱা অৱস্থাত জ্বলি উঠে সাসাৰাম-পাটনা যাত্ৰীবাহী ৰে’ল। দুৰ্ঘটনাৰ পাছতে উপস্থিত হয় উদ্ধাৰকাৰী দল। বিহাৰৰ ৰোহতাছ জিলাৰ সাসাৰাম ৰে’ল ষ্টেচনত সংঘটিত হয় এই দুৰ্ঘটনা।
মাজ আকাশতে ধ্বংস আমেৰিকাৰ দুখনকৈ যুঁজাৰু বিমান। জ্বলি উঠিল দুখন EA-18G গ্ৰ’লাৰ যুঁজাৰু বিমান। এয়াৰ শ্ব’ৰ সময়ত দুৰ্ঘটনাগ্ৰস্ত দুয়োখন বিমান। আমেৰিকাৰ মাউন্টেইন হোম এয়াৰ ফৰ্চ বেছত অনুষ্ঠিত হৈছিল এয়াৰ শ্ব’।
