‘শ্বেখ হাছিনাক সহায় কৰি থাকিলে ভাৰতৰ সৈতে বাংলাদেশৰ পাৰস্পৰিক সহযোগিতা বৰ্তাই ৰখাটো অসম্ভৱ হ’ব।’ শ্বেখ হাছিনাক আশ্ৰয় দিয়াক লৈ ভাৰতৰ বিৰুদ্ধে এইদৰে ক্ষোভ প্ৰকাশ কৰিছে বাংলাদেশ নেশ্যনেলিষ্ট পাৰ্টীৰ নেত্ৰী তথা প্ৰাক্তন প্ৰধানমন্ত্ৰী খালেদা জিয়াই।
বিগত এমাহ ধৰি চাকৰিৰ সংৰক্ষণৰ বিৰোধিতাৰে বাংলাদেশত অব্যাহত আছে প্ৰতিবাদ। ভয়াৱহ পৰিস্থিতিৰ প্ৰতি লক্ষ্য ৰাখি পদত্যাগ কৰি ভাৰতত আশ্ৰয় ল’বলগীয়া হৈছে দেশখনৰ প্ৰধানমন্ত্ৰী হিচাপে কাৰ্যনিৰ্বাহ কৰি থকা শ্বেখ হাছিনাই।
পদত্যাগী প্ৰধানমন্ত্ৰীগৰাকীক ভাৰতে আশ্ৰয় দিয়াক লৈ ক্ষোভ উজাৰিলে দেশখনৰ একাংশ নেতাই।
শ্বেখ হাছিনাক সহায় কৰি থাকিলে ভাৰতৰ সৈতে সম্পৰ্ক বৰ্তাই ৰখাটো অসম্ভৱ হ’ব বুলি একপ্ৰকাৰ সকীয়াই দিলে বাংলাদেশৰ প্ৰাক্তন প্ৰধানমন্ত্ৰী খালেদা জিয়াই।
BNP-ৰ জ্যেষ্ঠ নেতা তথা প্ৰাক্তন মন্ত্ৰী গয়েশ্বৰ ৰয়ে ৰাষ্ট্ৰীয় সংবাদ মাধ্যমৰ সৈতে হোৱা এটি সাক্ষাৎকাৰত কয় যে তেওঁৰ দলে ভাৰত আৰু বাংলাদেশৰ পাৰস্পৰিক সহযোগিতাৰ সমৰ্থন কৰে। কিন্তু শত্ৰুক সহায় কৰি থাকিলে ভাৰতৰ সৈতে পাৰস্পৰিক সহযোগিতা বৰ্তাই ৰখাটো কঠিন হ’ব বুলি উল্লেখ কৰে নেতাগৰাকীয়ে।
ইয়াৰ লগতে ভাৰতে পুনৰ শ্বেখ হাছিনাক বাংলাদেশৰ প্ৰধানমন্ত্ৰী হোৱাটো বিচাৰে বুলিও অভিযোগ তুলিছে নেতাগৰাকীয়ে।
সম্প্ৰতি ভাৰততে আশ্ৰয় লৈ আছে শ্বেখ হাছিনাই। দেশখনৰ ৰাজনৈতিক অস্থিৰতা অব্যাহত থকাৰ মাজতে শ্বেখ হাছিনাৰ পুত্ৰ সজীব ৱাজেদৰ ডাঙৰ মন্তব্য। সজীব ৱাজেদৰ মতে, বাংলাদেশলৈ পুনৰ উভতি যাব শ্বেখ হাচিনা। যেতিয়াই দেশখনৰ নতুন অন্তৰ্ৱৰ্তীকালীন চৰকাৰ নিৰ্বাচন অনুষ্ঠিত কৰাৰ সিদ্ধান্ত ল’ব, তেতিয়াই প্ৰাক্তন প্ৰধানমন্ত্ৰী শ্বেখ হাছিনাই নিজৰ দেশলৈ উভতি যাব বুলি মন্তব্য কৰিছে শ্বেখ হাছিনাৰ পুত্ৰই।
বাংলাদেশৰ ৰাজনৈতিক অস্থিৰতাৰ আঁৰত পাকিস্তানৰ হাত আছে বুলিও অভিযোগ তুলিছে সজীব ৱাজেদে। ইয়াৰ লগতে শ্বেখ হাছিনাৰ সুৰক্ষাৰ বাবে প্ৰধানমন্ত্ৰী নৰেন্দ্ৰ মোদী আৰু ভাৰত চৰকাৰক ধন্যবাদ জ্ঞাপন কৰে।
আৱামী লীগক ভাৰতৰ সহযোগী বুলি আখ্যা দি ভাৰতক আন্তঃৰাষ্ট্ৰীয় হেঁচাৰ জৰিয়তে দলটোৰ নেতাসকলৰ সুৰক্ষাৰ বাবে তেওঁ আহ্বান জনায়। লগতে অন্তৱৰ্তীকালীন চৰকাৰৰ মুৰব্বী ন’বেল বঁটা বিজয়ী মহম্মদ ইউনুছক দেশখনত শান্তি বাহাল কৰাৰ বাবে দাবী জনায়।
