ব্ৰাজিলত সংঘটিত হয় এক ভয়ংকৰ বিমান দুৰ্ঘটনা। ব্ৰাজিলৰ চাও পাওলোত সংঘটিত হয় এই বিমান দুৰ্ঘটনা। তথ্য অনুসৰি, দুৰ্ঘটনাগ্ৰস্ত বিমানখনত যাত্ৰী, চালক-কৰ্মচাৰীকে ধৰি মুঠ ৬২ গৰাকীকৈ লোক উপস্থিত আছিল। ইয়াৰে ৬১ গৰাকীকৈ লোকৰ প্ৰাণহানি হয়। কথমপি ১জন লোকৰ প্ৰাণ ৰক্ষা পৰে।
সম্প্ৰতি সকলো সংবাদ মাধ্যমতেই এই ভয়াৱহ বিমান দুৰ্ঘটনাৰ ভিডিঅ’ বিয়পি পৰিছে। এই ভিডিঅ’ত দেখিবলৈ পোৱা গৈছে যে, এক তীব্ৰ গতিত এখন বিমান আকাশৰ পৰা নামি আহি হঠাতেই মাটিত খুন্দা মাৰে আৰু তাৰ পাছতেই এক বৃহৎ বিস্ফোৰণ ঘটি বিমানখন নিমিষতে ধ্বংস হৈ যায়।
চিএনএনৰ প্ৰতিবেদন অনুসৰি, ব্ৰাজিলৰ আঞ্চলিক বিমানসংস্থা VOEPASSৰ 2283-PS-VPB নামৰ বিমানখন দুৰ্ঘটনাগ্ৰস্ত হয়। বিমান সংস্থাটোৰ বিবৃতি অনুসৰি, দুৰ্ঘটনা সংঘটিত হোৱাৰ সময়ত বিমানখনত ৫৮ গৰাকী যাত্ৰীৰ সৈতে ৪ জন ক্ৰু মেম্বাৰ উপস্থিত থাকে। আৱাসিক এলেকাত সংঘটিত হয় এই দুৰ্ঘটনা।
FLIGHTRADARৰ তথ্য অনুসৰি, স্থানীয় সময় অনুসৰি দুপৰীয়া ১:৩০ ত VOEPASS বিমানখন কাক্সাভেলৰ পৰা উৰা মাৰি চাও পাওলালৈ যোৱাৰ পথত দুৰ্ঘটনাগ্ৰস্ত হয়। অৱশ্যে বৰ্তমানেও এই দুৰ্ঘটনাৰ আঁৰৰ কাৰণ জানিব পৰা হোৱা নাই।
