নলবাৰীত তীব্ৰবেগী ডাম্পাৰৰ খুন্দাত এগৰাকী কলেজীয়া ছাত্ৰীয়ে প্ৰাণ হেৰুওৱাক কেন্দ্ৰ কৰি আজি ৰাতিপুৱাৰে পৰা চহৰখনৰ গণেশ মন্দিৰ চ’কত এক উত্তপ্ত পৰিৱেশৰ সৃষ্টি হয়।
আজি ৰাতিপুৱা এখন নিয়ন্ত্ৰণহীন ডাম্পাৰৰ খুন্দাত পায়েল দেৱনাথ নামৰ এগৰাকী ছাত্ৰীৰ মৃত্যু হৈছিল।
নলবাৰীৰ ক্ষুদ্ৰ কটলা বৰসৰকুছিৰ পায়েল আছিল স্প্ৰিংদেল একাডেমিৰ ছাত্ৰী। আজি ঘৰৰ পৰা কলেজলৈ চাইকেলেৰে আহি থকা সময়তে নলবাৰী-ধমধমা পথত নিয়ন্ত্ৰণহীন ডাম্পাৰে মহতিয়াই লৈ যায় ছাত্ৰী গৰাকীক।
প্ৰশাসন আৰু ডাম্পাৰৰ মালিক ঠিকাদাৰৰ মিতিৰালিৰ বাবেই এই শোকাৱহ পথ দুৰ্ঘটনাটো সংঘটিত হোৱাৰ অভিযোগ উত্থাপন কৰিছে স্থানীয় ৰাইজে।
ইফালে দুৰ্ঘটনাটো সংঘটিত কৰিয়েই ডাম্পাৰখনে ঘটনাস্থলৰ পৰা পলায়ন কৰাত স্থানীয় ৰাইজ উত্তেজিত হৈ গণেশ মন্দিৰ চ’কত টায়াৰ জ্বলাই তীব্ৰ প্ৰতিবাদ সাব্যস্ত কৰে।
দুৰ্ঘটনাৰ উচিত তদন্ত তথা নিয়ন্ত্ৰণহীন ডাম্পাৰৰ দৌৰাত্ম্য ৰোধ কৰাৰ বাবে অব্যাহত থকা প্ৰতিবাদৰ সময়তে ৰাষ্ট্ৰীয় ঘাইপথত আৱদ্ধ হৈ পৰে বি পি এফ প্ৰধান হাগ্ৰামা মহিলাৰী। ৰাষ্ট্ৰীয় ঘাইপথত প্ৰতিবাদ কৰি থকা প্ৰতিবাদকাৰীয়ে গাড়ীৰ পৰা নমাই আনে হাগ্ৰামা মহিলাৰীক।
পৰিস্থিতি অধিক ভয়াৱহ হৈ পৰাত হাগ্ৰামা মহিলাৰীয়ে জিলা আৰক্ষী অধীক্ষকৰ পৰা সমগ্ৰ ঘটনা সন্দৰ্ভত বুজ লয়। মহিলাৰীয়ে আজি দিল্লীৰ পৰা নিজ গৃহলৈ আহি থকা অৱস্থাত প্ৰতিবাদৰ সন্মুখীন হয়।
দুৰ্ঘটনাৰ বলি হোৱা ছাত্ৰীগৰাকীৰ পৰিয়ালক ক্ষতিপূৰণ দিয়াৰ লগতে ঘটনাৰ উচিত বিচাৰ কৰাৰ দাবীত প্ৰতিবাদকাৰীয়ে ৰাষ্ট্ৰীয় ঘাইপথ অৱৰোধ কৰি প্ৰতিবাদ অব্যাহত ৰাখিছিল।
ইফালে প্ৰতিবাদে ভয়ংকৰ ৰূপ ধাৰণ কৰাত ঘটনাস্থলীত উপস্থিত হয় জিলা আয়ুক্ত বৰ্ণালী ডেকা। উপায়ুক্তগৰাকী উপস্থিত হোৱাৰ পিছতে শান্ত হয় প্ৰতিবাদকাৰী শিক্ষাৰ্থী।
প্ৰতিবাদকাৰী শিক্ষাৰ্থীৰ সকলো দাবী জিলা আয়ুক্তই মানি লোৱাৰ পিছতেই প্ৰতিবাদ প্ৰত্যাহাৰ কৰে। ঘটনা সন্দৰ্ভত তদন্ত ঘোষণা কৰে জিলা আয়ুক্ত বৰ্ণালী ডেকাই।
দুদিনৰ ভিতৰত তদন্তৰ প্ৰতিবেদন জমা দিয়াৰ নিৰ্দেশ প্ৰদান কৰিছে জিলা উপায়ুক্তগৰাকীয়ে।
প্ৰায় পাঁচ ঘন্টা জুৰি চলা প্ৰতিবাদৰ ফলত ৰাষ্ট্ৰীয় ঘাইপথত আৱদ্ধ হৈ পৰিছিল শ-শ যান বাহন।
ইফালে শেহতীয়াকৈ লাভ কৰা খবৰ অনুসৰি, নলবাৰী গণেশ মন্দিৰ চ’কত পথ দুৰ্ঘটনা সংঘটিত কৰা ডাম্পাৰৰ চালকক আটক কৰিছে নলবাৰী আৰক্ষীয়ে। তদন্তকাৰী আৰক্ষীৰ দলটোৱে লগতে জব্দ কৰে দুৰ্ঘটনা সংঘটিত কৰা ডাম্পাৰখন।
দুৰ্ঘটনা সংঘটিত কৰা AS 02 CC 1547 নম্বৰ সম্বলিত ডাম্পাৰখনৰ চালক পবিত্ৰ কলিতাক আটক কৰি ঘটনা সন্দৰ্ভত সোধা পোচা অব্যাহত ৰাখিছে।
