বৈঠালাংছ’ৰ পশ্চিম কাৰ্বি আংলং আৰু নগাঁও সীমান্তবৰ্তী বৰপথাৰত সংগঠিত এক শ্বাসৰুদ্ধকৰ তথা আমোদজনক ঘটনা। যি ঘটনাই দাঙি ধৰিছে ড্ৰাগছৰ ভয়াৱহতাৰ কাহিনী।
ড্ৰাগছ আসক্ত পুত্ৰই কৰিলে এক আচৰিত কাণ্ড। পিতৃৰ পৰা দাবী কৰা ধন নাপাই পুত্ৰই চিপজৰী লৈ উঠিল গছত। পিছে তাৰপাছত কি হ’ল জানো আহক।
মংগলবাৰে বৈঠালাংছ’ৰ বৰপথাৰ গাঁৱৰ নাৰায়ণ ৰায় নামৰ ২৬ বছৰীয়া ড্ৰাগচ আসক্ত যুৱকজনে পিতৃ মদন ৰায়ৰ পৰা বিচাৰে এহেজাৰ টকা। দিন হাজিৰা কৰি পৰিয়াল পোহপাল দিয়া দৰিদ্ৰ বৃদ্ধ পিতৃয়ে লোকৰ পৰা ধাৰ কৰি কোনোমতে পুত্ৰক পাঁচশ টকা আনি দিয়ে।
এই কথাতেই ৰুদ্ৰ ৰূপ ধাৰণ কৰি পুত্ৰ নাৰায়ণে বৃদ্ধ পিতৃক শাৰীৰিকভাৱে আক্ৰমন কৰে। ইয়াতেই ক্ষান্ত নাথাকি এহেজাৰ টকা দিব নোৱাৰিলে আত্মহত্যা কৰাৰ ভাবুকি দিয়ে। তেওঁ হাতত এডাল ৰছী লৈ বাৰীৰ পিছফালে থকা এজোপা গছত উঠে।
তাৰ পিছত গছজোপাৰ তলৰ পৰা পিতৃৰ লগতে গাঁওবাসীয়ে নাৰায়ণক গছৰ পৰা নামি আহিবলৈ বাৰে বাৰে বুজনি দিয়ে।
ঘটনাস্থলীত বৈঠালাংছ’ আৰক্ষী আহি উপস্থিত হয়। কিন্তু তাৰপাছতো নাৰায়ণ তললৈ নামি নাহে। ইয়াৰ পাছত কেইবাঘন্টা জোৰা এক শ্বাসৰুদ্ধকৰ নাটকৰ পিছত ৰাইজে গছজোপা কাটি দিয়াৰ সিদ্ধান্ত লয়। কথামতেই কাম। আৰক্ষীৰ সহযোগত উপস্থিত ৰাইজে গছজোপা কাটি দিয়ে। তাৰ পাছতেই নাৰায়ণে গছৰ পৰা আম সৰা দি তললৈ সৰি পৰে। ইয়াৰ পাছত তেওঁ সামান্যভাৱে আঘাতপ্ৰাপ্ত হয়।
উক্ত ঘটনাই স্থানীয় লোকসকলক আমোদ দিয়ে যদিও ড্ৰাগছৰ কবলত পৰি একাংশ লোকে এখন ঘৰ বা পৰিয়ালক কেনে পৰ্যায়ৰ মানসিক যন্ত্ৰনা দি আহিছে তাৰ এক কৰুণ প্ৰতিচ্ছবিও স্পষ্ট ৰূপত ফুটাই তুলে।
