এতিয়াৰে পৰা শিৱসাগৰৰ ব্যৱসায়িক প্ৰতিষ্ঠানত ব্যৱহাৰ কৰিব লাগিব অসমীয়া ভাষাৰ নাম ফলক। আজি এই গুৰুত্বপূৰ্ণ নিৰ্দেশনা প্ৰদান কৰে শিৱসাগৰ পৌৰসভাই।
শিৱসাগৰ চহৰত এগৰাকী খিলঞ্জীয়া যুৱতীৰ ওপৰত অনা অসমীয়া ব্যৱসায়ীয়ে আক্ৰমণ কৰাক লৈ আৰম্ভ হোৱা প্ৰতিবাদৰ পিছতেই শিৱসাগৰ প্ৰশাসনক ১০টা দাবী জনাইছিল ৩০ জাতীয় দল-সংগঠনে।
দল-সংগঠনে আৰম্ভ কৰা বহিৰাগত বিৰোধী আন্দোলনৰ দহ দাবীৰ ভিতৰত অন্যতম দাবী আছিল শিৱসাগৰৰ ব্যৱসায়িক প্ৰতিষ্ঠানত অসমীয়া ভাষাৰ নাম ফলকৰ ব্যৱহাৰ।
শিৱসাগৰৰ দোকান, ব্যৱসায়ী প্ৰতিষ্ঠানত অসমীয়া ভাষাত নাম ফলক লিখাটো বাধ্যতামূলক কৰিলে শিৱসাগৰ পৌৰসভাই। অসমীয়া ভাষাত নামফলক লিখিবলৈ ৭ দিনৰ সময়সীমা বান্ধি দিছে শিৱসাগৰ পৌৰসভাই।
শিৱসাগৰ পৌৰসভাই আজি জাৰি কৰা এক নিৰ্দেশনাত উল্লেখ কৰে, ‘পৌৰ এলেকাৰ ১ নং ৱাৰ্ডৰ পৰা ১৪ নং ৱাৰ্ডলৈকে থকা দোকান বা ব্যৱসায়িক প্ৰতিষ্ঠনৰ গৰাকীসকলক তেওঁলোকৰ দোকানৰ সন্মুখত আঁৰা নাম ফলকসমূহ সাত দিনৰ ভিতৰত অসমীয়া ভাষাত লিখি প্ৰত্যেক দোকান বা ব্যৱসায়ীক প্ৰতিষ্ঠানৰ সন্মুখত লগাবৰ বাবে নিৰ্দেশ দিয়া হ’ল’।
ইয়াৰ উপৰি অসমীয়া ভাষাত লিখিবলগীয়া নাম ফলক সমূহৰ আৰ্হি পৌৰসভাই দিয়া চানেকী অনুসৰি হোৱাটো বাধ্যতামূলক বুলিও জাননীখনত উল্লেখ কৰে।
