অন্ধ্ৰপ্ৰদেশ আৰু তেলেংগানাত প্ৰকৃতিয়ে লৈছে ভয়ংকৰ ৰূপ। বিগত কিছু দিনৰ পৰা হোৱা নেৰানেপেৰা বৰষুণৰ ফলত সৃষ্টি হোৱা বানত দুয়োখন ৰাজ্যৰ কমেও ১৯ গৰাকী লোকৰ মৃত্যু হোৱাৰ লগতে ১৭ হাজাৰৰো অধিক লোকক সুৰক্ষিত স্থানলৈ লৈ যোৱা হৈছে।
এই অভাৱনীয় পৰিস্থিতিৰ সৈতে মোকাবিলা কৰিবলৈ দক্ষিণ ছবি জগতৰ অন্যতম জনপ্ৰিয় অভিনেতা জুনিয়ৰ এন টি আৰে দুয়োখন ৰাজ্যৰে মুখ্যমন্ত্ৰীৰ সাহায্য পুঁজিলৈ ৫০-৫০ লাখকৈ টকা আগবঢ়াইছে।
অভিনেতাগৰাকীয়ে ছ’চিয়েল মিডিয়াযোগে এটা পোষ্টত কয়, ‘শেহতীয়াকৈ দুখন তেলেগু ৰাজ্যত হোৱা ধাৰাসাৰ বৰষুণৰ ফলত হোৱা বানপানীয়ে মোক গভীৰভাৱে চিন্তিত কৰি তুলিছে। ভগৱানৰ ওচৰত প্ৰাৰ্থনা কৰিছো যাতে তেলেগুবাসীয়ে এই দুৰ্যোগৰ পৰা শীঘ্ৰে মুক্তি লাভ কৰে। মোৰ ফালৰ পৰা মই মুখ্যমন্ৰ সাহায্য পুঁজিলৈ ৫০ লাখ টকাকৈ অনুদান ঘোষণা কৰিছো’।
উল্লেখ্য যে শেহতীয়াকৈ হোৱা নেৰানেপেৰা বৰষুণৰ ফলত দুয়োখন ৰাজ্যত বানে সংহাৰী ৰূপ ধাৰণ কৰিছে। ইয়াৰ মাজতে প্ৰায় ১৯ গৰাকী লোকে মৃত্যুক সাৱটি লোৱাৰ লগতে বহু সম্পত্তি বিনষ্ট হোৱাৰ খবৰ আহিছে।
