আজি মহাপুৰুষ শ্ৰীমন্ত শংকৰদেৱৰ পৱিত্ৰ তিৰোভাৱ তিথি। হৰিনামৰ ধ্বনীৰে মুখৰিত ৰাজ্যৰ আকাশ বতাহ। ৰাজ্যৰ বিভিন্ন সত্ৰ নামঘৰৰ লগতে গুৰুজনাৰ জন্মস্থান বটদ্ৰৱা থানত পুৱাৰে পৰা নাম-প্ৰসংগৰে মুখৰিত হৈ পৰিছে।
ভক্তিৰসত মগন চৌদিশ। শংকৰদেৱৰ তিৰোভাৱ তিথি উৎসৱটি বটদ্ৰৱা থানত ‘গুৰু কীৰ্তন’ হিচাপে পালন কৰা হয়।
পৰম্পৰা অনুসৰি, শ শ বছৰ ধৰি দুদিনীয়া কাৰ্যসূচীৰে পালন হৈ আহিছে বটদ্ৰৱা থানৰ গুৰু কীৰ্তন উৎসৱ। ধৰ্মীয় পৰম্পৰাৰে আৰম্ভ হৈছে তিৰোভাৱ তিথিৰ এই কাৰ্যসূচী। শংখ, দবা তাল, মঞ্জিৰা নাম, আইৰ নাম, খোল আদি বিভিন্ন কাৰ্যসূচীৰে মুখৰিত হয় বটদ্ৰৱা থান।
ইফালে উষা কীৰ্তন কৰি হৰি নামৰ অমল ধ্বনিৰে মুখৰিত হৈ পৰে বটদ্ৰৱাৰ চৌপাশ।গুৰুজনাৰ তিৰোভাৱ তিথি উপলক্ষে ৰাজ্যৰ বিভিন্ন প্ৰান্তৰ ভকত বৈষ্ণৱসকলে ঐতিহাসিক পীঠসমূহত উপস্থিত হৈ ধূপ-নৈবদ্য আগবঢ়াই নেদেখাজনৰ ওচৰত শৰণাপন্ন হয়।আশীষ লয় অক্ষয় বন্তিৰ।
