পিয়াজৰ দামৰ পৰা আপুনি অতিষ্ঠ হৈছে নেকি? যদি হৈছে তেতিয়াহলে এতিয়াৰে পৰাই চিন্তাৰ কোনো কাৰণ নাই। কিয়নো প্ৰতিকিলোগ্ৰাম পিয়াজ আপুনি পাব ৩৫ টকাত।
কেন্দ্ৰীয় চৰকাৰে ৰাজ সাহায্যপ্ৰাপ্ত হাৰত পিয়াজ বিক্ৰী কৰাৰ সিদ্ধান্ত গ্ৰহণ কৰিছে। অৱশ্যে, ৩৫ টকাত পিয়াজ ক্ৰয় কৰিবলৈ হ’লে আপুনি বাস কৰিব লাগিব দেশৰ ৰাজধানী দিল্লীত। দিল্লী আৰু ইয়াৰ কাষৰীয়া অঞ্চলত কেন্দ্ৰীয় চৰকাৰে ৩৫ টকা দামত পিয়াজ বিক্ৰী কৰাৰ সিদ্ধান্ত গ্ৰহণ কৰিছে।
ৰাজধানী দিল্লীত ৬০ টকা হোৱা পিয়াজৰ মূল্যত অতিষ্ঠ হৈছিল সাধাৰণ জনতা। জনতাৰ দাবীক স্বীকৃতি প্ৰদান কৰি চৰকাৰে ৰাজসাহায্যত পিয়াজ বিক্ৰী কৰাৰ সিদ্ধান্ত গ্ৰহণ কৰিছে।
বুধবাৰে কেন্দ্ৰীয় চৰকাৰে জনাইছিল যে, তেওঁলোকে বৃহস্পতিবাৰৰ পৰাই দিল্লী-এনচিআৰত পিয়াজ বিক্ৰী কৰিব। উপভোক্তা পৰিক্ৰমা মন্ত্ৰালয়ে ইয়াৰ বাবে এনচিচিএফ আৰু নাফেদক নিৰ্দেশ প্ৰদান কৰিছে। এই চৰকাৰী গোটে সাধাৰণ ৰাইজক প্ৰতি কিলোগ্ৰামত ৩৫ টকা মূল্যত পিয়াজ প্ৰদান কৰিব।
নাফেড আৰু এনচিচিএফৰ কাম
চৰকাৰী সংস্থা নাফেদ আৰু এনচিচিএফ দুয়োটাই চৰকাৰৰ হৈ সস্তীয়া মূল্যত সাধাৰণ ৰাইজৰ মাজত খাদ্য সামগ্ৰী উপলব্ধ কৰাৰ বাবে কাম কৰে। এই প্ৰতিষ্ঠানবোৰে কেন্দ্ৰীয় ভাণ্ডাৰ ভ্ৰাম্যমাণ ভেন আৰু অন্যান্য উপায়েৰে ৰেহাই মূল্যত জনসাধাৰণৰ মাজত খাদ্য সামগ্ৰী বিতৰণ কৰাৰ বাবে কাম কৰে।
চৰকাৰে সস্তীয়া ময়দা, মাহজাতীয় শস্য, চাউল বিক্ৰী
বৰ্তমান চৰকাৰে মুদ্ৰাস্ফীতিৰ পৰা সাধাৰণ লোকসকলক সুৰক্ষিত কৰিবলৈ আটা, মাহজাতীয় শস্য আৰু চাউল বিক্ৰী কৰে। চৰকাৰে বিগত বছৰত ‘ইণ্ডিয়া’ ব্ৰেণ্ড নামৰ অধীনত ময়দা, মাহজাতীয় শস্য আৰু চাউল মুকলি কৰিছিল।
