অসমত এতিয়াৰে পৰা আধাৰ কাৰ্ড বনাবলৈ নতুন আবেদনকাৰীয়ে এন আৰ চিৰ আবেদনৰ ৰচিদ নম্বৰ দিব লাগিব। শনিবাৰে মুখ্যমন্ত্ৰী হিমন্ত বিশ্ব শৰ্মাই এই ঘোষণা কৰে।
জনসংখ্যাতকৈ আধাৰ কাৰ্ডৰ বাবে আবেদনকাৰীৰ সংখ্যা অধিক বুলি মন্তব্য কৰি মুখ্যমন্ত্ৰীয়ে কয়, ‘অৰ্থাৎ একাংশ নাগৰিক সন্দেহ হ’ব পাৰে। গতিকে আমি সিদ্ধান্ত লৈছো যে নতুনকৈ আবেদনকাৰীয়ে তেওঁলোকৰ এন আৰ চিৰ আবেদনৰ ৰচিদ নম্বৰ দিব লাগিব’।
সংবাদ মাধ্যমত দিয়া এক বিবৃতিত মুখ্যমন্ত্ৰীয়ে কয় যে এন আৰ চি প্ৰক্ৰিয়াৰ সময়ত ৯.৫৫ লাখ লোকৰ বায়’মেট্ৰিক তথ্য লিপিবদ্ধ কৰা হৈছে। এইসকল লোকক এন আৰ চিৰ আবেদনৰ ৰচিদ নম্বৰৰ প্ৰয়োজন নাই। এইসকল লোকক ৰচিদ নম্বৰ অবিহনে আধাৰ কাৰ্ড প্ৰদান কৰা হ’ব।
১৬ বছৰৰ বয়সৰ ওপৰৰ লোকৰ বাবে আধাৰ কাৰ্ডৰ বাবে লাগিব এ আৰ চিৰ তথ্য। ১ অক্টোবৰৰ পৰা অসমত প্ৰযোজ্য হ’ব এই নতুন নিয়ম। অৱশ্যে এই নতুন নিয়মৰ আওতাত নপৰে চাহ বাগিচাৰ লোক।
মুখ্যমন্ত্ৰীয়ে আৰু কয় যে এই সকলোবোৰ অবৈধভাৱে বসবাস কৰা বাংলাদেশী নাগৰিকক চিনাক্তকৰণৰ বাবে কৰা হৈছে। ৰাজ্যখনত বহু বাংলাদেশী নাগৰিকে বসবাস কৰি আছে। এতিয়া অসম চৰকাৰ ইয়াত অবৈধভাৱে বসবাস কৰা বিদেশী নাগৰিক আৰু বাংলাদেশী চিনাক্তকৰণত ব্যস্ত। এই সমগ্ৰ প্ৰক্ৰিয়াটো যোৱা কেইমাহমানত ক্ষিপ্ৰতাৰে কৰা হৈছে।
যোৱা দুমাহত এনে বহু লোকক আটক কৰি বাংলাদেশী কৰ্তৃপক্ষক গতাই দিয়া বুলিও মুখ্যমন্ত্ৰীগৰাকীয়ে উল্লেখ কৰে।
