মধ্য প্ৰদেশৰ সাগৰ জিলাৰ পৰা আহিছে এক আশ্বৰ্যকৰ খবৰ। ইয়াৰ মহকুমাধিপতি কাৰ্যালয়ত দাখিল কৰা এটা পৰিয়ালৰ এখন আয়ৰ প্ৰমাণ পত্ৰই এতিয়া দেশজুৰি চৰ্চা লাভ কৰিছে। আয়ৰ প্ৰমাণ পত্ৰ দাখিল কৰা পৰিয়ালটোৰ বাৰ্ষিক আয় মাত্ৰ ২ টকা বুলি উল্লেখ কৰা হৈছে।
এই ঘটনাটো সাগৰ জিলাৰ বাণ্ডা মহকুমাৰ। এই প্ৰমাণ পত্ৰখনত বিভাগীয় বিষয়াই স্বাক্ষৰ কৰাও স্পষ্টকে দেখা পোৱা গৈছে। এই ঘটনাই সকলোকে স্তম্ভিত কৰি তোলাৰ লগতে প্ৰশ্ন উত্থাপন কৰিছে যে সঁচাকৈয়ে এটা পৰিয়াল ইমান দুখীয়া হ’ব পাৰে নে?
ইতিমধ্যে এই সমগ্ৰ বিষয়টো পোহৰলৈ অহাৰ পিছত তদন্তৰ নিৰ্দেশ দিয়া হৈছে যাতে সঠিক তথ্য নিশ্চিত কৰিব পৰা যায়।
২০২৪ চনৰ জানুৱাৰী মাহত এই আয়ৰ প্ৰমাণপত্ৰ প্ৰদান কৰা হৈছিল। এই প্ৰমাণ পত্ৰত সমগ্ৰ পৰিয়ালটোৰ আয় মাত্ৰ দুটকা বুলি দেখুওৱা হৈছে। এই কথা পোহৰলৈ আহে যেতিয়া সোমবাৰে এই প্ৰমাণ পত্ৰৰ ছবি ছ’চিয়েল মিডিয়াত ভাইৰেল হৈ পৰে।
এই প্ৰমাণ পত্ৰখন ছ’চিয়েল মিডিয়াত ভাইৰেল হৈ পৰাৰ লগে লগে ৰাইজৰ মাজত আলোড়নৰ সৃষ্টি হয় আৰু ইয়াৰ ওপৰত বিভিন্ন ধৰণৰ প্ৰতিক্ৰিয়া দিবলৈ আৰম্ভ কৰে। বহুতে ইয়াক প্ৰশাসনৰ অৱহেলা বুলি গণ্য কৰাৰ বিপৰীতে একাংশই প্ৰশ্ন কৰিছে যে সঁচাকৈয়ে ইমান কম উপাৰ্জনেৰে এটা পৰিয়াল জীয়াই থাকিব পাৰিবনে?
উল্লেখ্য যে, এই ঘটনা স্থানীয় প্ৰশাসনৰ বাবে প্ৰত্যাহ্বান ৰূপত থিয় দিছে, যিটো এতিয়া অতি শীঘ্ৰে সমাধান কৰাৰ প্ৰয়োজন আছে।
