ঝাৰখণ্ডত অনুষ্ঠিত হ’বলগীয়া বিধানসভা নিৰ্বাচনৰ বাবে বিজেপি নেতৃত্বাধীন সহযোগী দলসমূহৰ মাজত চূড়ান্ত হ’ল আসন ভাগ-বাটোৱাৰা। শুকুৰবাৰে ৰাঁচীস্থিতি বিজেপি কাৰ্যালয়ত বিজেপি আৰু এ জে এছ ইউয়ে সংবাদমেলযোগে আসন ভাগ-বাটোৱাৰা চূড়ান্ত হোৱা বুলি ঘোষণা কৰে।
ঝাৰখণ্ড বিধানসভা নিৰ্বাচনত এন ডি এৰ দলসমূহৰ ভিতৰত বিজেপিয়ে ৬৮, এ জে এছ ইউয়ে ১০, জেডিইউৱে ২ আৰু এল জে পি (ৰামবিলাস) দলে এখন আসনত প্ৰতিদ্বন্দ্বিতা কৰিব।
বিজেপিৰ সহযোগী দলসমূহৰ মাজত আসন ভাগ-বাটোৱাৰা নিশ্চিত হোৱাৰ কথা জানিবলৈ দিয়ে বিজেপিৰ নিৰ্বাচনী প্ৰভাৰী শিৱৰাজ সিং চৌহান আৰু সহ-প্ৰভাৰী হিমন্ত বিশ্ব শৰ্মাই।
ৰাঁচীত সংবাদ মাধ্যমক সম্বোধন কৰি কেন্দ্ৰীয় মন্ত্ৰী তথা নিৰ্বাচনী প্ৰভাৰী শিৱৰাজ সিং চৌহানে কয়, ‘ৰাজ্যত বিজেপি, এ জে এছ ইউ, জে ডি ইউ, আৰু এল জে পি (ৰামবিলাস) দলে একেলগে মিলি নিৰ্বাচনত প্ৰতিদ্বন্দ্বিতা আগবঢ়াম’।
সংবাদমেলত উপস্থিত আছিল নিৰ্বাচনী সহ-প্ৰভাৰী তথা অসমৰ মুখ্যমন্ত্ৰী ড০ হিমন্ত বিশ্ব শৰ্মা, ঝাৰখণ্ড বিজেপিৰ অধ্যক্ষ বাবুলাল মৰাণ্ডী, এ জে এছ ইউ প্ৰধান সুদেশ মহাতোৰ লগতে আন আন নেতাসকল উপস্থিত আছিল।
উল্লেখ্য যে, নিৰ্বাচনী আয়োগে ঘোষণা কৰা অনুসৰি ঝাৰখণ্ডত দুটা পৰ্যায়ত অনুষ্ঠিত হ’ব বিধানসভা নিৰ্বাচনৰ ভোটগ্ৰহণ। অহা ১৩ নৱেম্বৰ আৰু ২০ নৱেম্বৰত ভোটগ্ৰহণ অনুষ্ঠিত হ’ব। আনহাতে, ২৩ নৱেম্বৰত মহাৰাষ্ট্ৰৰ লগতে ঝাৰখণ্ডৰ নিৰ্বাচনৰ ফলাফল ঘোষণা কৰা হ’ব।
৮১ খন আসনযুক্ত ঝাৰখণ্ড বিধানসভাৰ ৪৪ খন আসন সংৰক্ষিত নহয়। ইয়াৰ উপৰি এছ টিৰ বাবে ২৮ খন আৰু এছ চিৰ বাবে ৯ খন আসন সংৰক্ষিত। নিৰ্বাচন আয়োগৰ তথ্য অনুসৰি ৰাজ্যখনত বৰ্তমান আছে প্ৰায় ২.৬ কোটি ভোটাৰ।
