বিহাৰৰ ছিৱান, সাৰণ আৰু গোপালগঞ্জ জিলাত বিষাক্ত সুৰা সেৱনৰ ফলত মৃত্যু হোৱাৰ ফলত দুগৰাকীকৈ আৰক্ষী বিষয়াক নিলম্বন কৰা হৈছে। এইক্ষেত্ৰত ৭গৰাকী মহিলাকে ধৰি ২১ গৰাকীকৈ লোকক গ্ৰেপ্তাৰ কৰা হৈছে।
২০ অক্টোবৰ অৰ্থাৎ দেওবাৰে এই তথ্য দিয়ে বিষয়াসকলে। জানিব পৰা মতে, তিনিখন জিলাকে ধৰি এই পৰ্যন্ত মুঠ ৩৭ জন লোকে প্ৰাণ হেৰুৱাইছে।
এই সমগ্র বিষয়ত মছৰাক থানাৰ ভাৰপ্ৰাপ্ত বিষয়া আৰু ভগৱানপুৰ আউটপোষ্টত নিয়োজিত আন এগৰাকী আৰক্ষী বিষয়াক নিজৰ কৰ্তব্যৰ ক্ষেত্ৰত অৱহেলা কৰাৰ বাবে নিলম্বন কৰা হৈছে। সাৰণ ৰেঞ্জৰ উপ-আৰক্ষী মহাপৰিদৰ্শক নীলেশ কুমাৰে পিটিআইক জনোৱা মতে, এই ঘটনাৰ পিছতেই ছিৱান আৰু সাৰণ জিলাৰ প্ৰশাসনে মাঘৰ, ঔৰিয়া আৰু ইব্ৰাহিমপুৰ অঞ্চলৰ পৰা তিনিজনকৈ চকীদাৰক নিলম্বন কৰিছে।
ছিৱানত সৰ্বাধিক ২৮ জন লোকৰ মৃত্যু
উল্লেখ্য যে, বিষাক্ত সুৰাৰ ফলত মৃত্যু হোৱা লোকৰ সংখ্যা ছিৱানত সৰ্বাধিক। ১৬ অক্টোবৰৰ পৰা ছিৱান জিলাৰ মাঘৰ আৰু ঔৰিয়া পঞ্চায়তত ২৮ জনকৈ লোকৰ মৃত্যু হৈছে। ছাৰণৰ মাশ্ৰক থানা এলেকাৰ অন্তৰ্গত ইব্ৰাহিমপুৰ অঞ্চলত ৭ জনকৈ লোকৰ মৃত্যু। গোপালগঞ্জত সুৰা সেৱন কৰি দুজন লোকৰ মৃত্যু হৈছে। এইদৰে তিনিখন জিলাত মুঠ ৩৭ জন লোকৰ মৃত্যু হৈছে।
ছিৱানত ১৩ জন আৰু সাৰণত ৮ জন লোকক গ্ৰেপ্তাৰ
এই সমগ্ৰ বিষয়ত ডি আই জিয়ে কয় যে, বিষাক্ত সুৰা বিক্ৰীৰ সৈতে জড়িত ২১ জনকৈ অভিযুক্ত (চিৱানত ১৩ আৰু সাৰণত ৮)ক আৰক্ষীয়ে গ্ৰেপ্তাৰ কৰিছে। ইয়াৰে ৭গৰাকী মহিলা, যিসকলে মদ্যপান আৰু বিক্ৰীৰ কামত জড়িত আছিল।দুয়োখন জিলাতে তেওঁলোকে অবৈধ সুৰাৰ যোগান তথ্য পাইছে লগতে অবৈধ সুৰা বিক্ৰীৰ সৈতে জড়িত কেইবা লাখ টকাৰ লেনদেনও ধৰা পেলাইছে আৰু এই সন্দৰ্ভত গুৰুত্বপূৰ্ণ ডিজিটেল প্ৰমাণো সংগ্ৰহ কৰিছে।
তেওঁ লগতে কয় যে, অভিযুক্তকেইজনৰ বিৰুদ্ধে ধন সৰবৰাহ আইনৰ বিধান অনুসৰি যোগ্য কৰ্তৃপক্ষই সুকীয়া গোচৰ ৰুজু কৰিব।
